Cotkaran li hember pirsgirêkên derbarê mazotê de derdikevin ji xwe re alternatîf avakirin e.
Gelek cotkarên ku xwediyên zeviyên avî ne, li şûna jeneratoran, enerjiya tavê bi kar tînin da ku zeviyên xwe av bidin.
Komîteyên Çandiniyê jî li gel hişkesaliyê cotkaran teşwîq dikin ku xwe bispêrin vê enerjiyê ku nûjen û dostê hawîrdorê ye.
Li Rojavayê kurdistanê ji ber kêmbûna barîna baranê di 3 salên dawîn de, cotkaran gelek zehmetî dîtin.
Ji ber wê cotkaran çareseriyên alternatîf peyda kirin û enerjiya tavê li şûna jeneratoran bi kar tînin.
Cotkarê bi navê Taha El Necim ku bi xwe ji navçeya Til Birak e destnîşan kir ku wan ji ber kêmbûna baranê û pirsgirêkên di jeneratoran de, berê xwe dan enerjiya alternatîf.
El Necim 102 tabloyên kişandina tavê peyda kirine ku bi rêya wan dînemoyê xwe yê bi xurtiya 40 hespan pêdixe.
Dînemoyê avê ji bîreke 175 metreyan bi rêjeya 5 înş derdixe û rûbera 420 donim erdê genim av dide.
Der barê cudahiya navbera jeneratorên mazotê û enerjiya tavê de El Necim got:
Enerjiya tavê enerjiyeke paqij e û ji bo jîngehê baş e, lê ew bi piranî bi roj û li gor germahiya tavê kar dike.
Cotkarekî din ê ji Qamişlo Yûsif Remedan li zeviya xwe 96 tabloyên kişandina tavê bi cih kirin û bi enerjiya wan dînemoya xwe ya 40 hespî pêdixe û bi rêjeya 4 înş avê ji bîrê derdixe.
Remedan diyar ku bicihkirina tabloyên kişandina tavê buha ye, Lêçûna bikaranîna her tabloyekê ji 110 heta 180 dolarên Amerîkî ye.
li aliyekî din Hevserokê Gerînendetiya Çandinî û Avdanê ya kantona Qamişlo Nayif Îbrahîm got:
“Em piştigriyê didin bikaranîna enerjiya tavê, ji ber ku hem ew ji bo jîngehê baş e, hem jî lêçûna wê kêmtir e.
Heta niha tu planên me yên pêşkêşkirina alîkariyê ji cotkaran re ji bo ku tabloyên kişandina tavê peyda bikin, tune ne.”
