Parlamenterê HDP’ê yê Wanê Mûrat Sarisaç dibêje dewlet xwe dispêre polîtîkayên şer û ewlekariyê, ti polîtîkayeke xweîderketina li jiyana mirovan tune ye. Parlamentera HDP’ê ya Wanê Mûazzez Orhan jî dibêje pêwîstiya mexdûrên li Îslahiyeyê bi alîkariyê heye û banga anîna konan ji bo wan kir.
Erdheja ku li Tirkiyê çêbû gelek zirar li dû xwe hişt.
Gelek dever li wir ziyan dîtin û gelek avahî jî hilweşiyan.
Parlamenterê HDP’ê yê Wanê Mûrat Sarisaç derbarê erdhejê de axivî.
Mûrat Sarisaç dibêje navçeya antakya ya Lîwa Skenderûnê jî gelekî zirar dîtine.
Sarisaç diyar kir ku ew çû serdana wan herêman û got: ”Li wir destwerdana pêwîst nehate kirin.
Li Bazarcixê, Elbistanê, Mereşê û cihên din mirov li ber kavilan bûn.
Û li benda derxistina xizmên xwe yên di bin kavilan de bûn, lê dewlet nehat.
Dewlet li wir tune bû. Baş eşkere bû ku dewlet xwe dispêre polîtîkayên şer û ewlekariyê.
Ti polîtîkayeke xweîderketina li jiyana mirovan tune ye.
Mexdûriyeke gelekî mezin heye. Erdhej qediya, lê belê mirov li derve di nava sermayê de ne.”
”Pêwîstiya mexdûran bi kona heye”
Parlamentera HDP’ê ya Wanê Mûazzez Orhan jî derbarê mijarê de ji ANF’ê re axivî.
Mûazzez Orhan ku ji roja destpêkê ve li Dîlokê ye, bûyerên ji 7’ê Sibatê û vir ve diqewimin vegot.
Mûazzez Orhan dibêje hîna jî hêvî heye lê dewlet wir paşguh dike û got:
”Doh dema ku me serdana kavilekî kir, gotin ku sê kes bi zindî hatine derxistin.
Ya rast hîn jî hêvî heye, lê belê desthilatdariya AKP’ê di du rojên destpêkê de negihîşt vê derê.
Rojên piştre jî tenê giranî dan ser deverên ku digotin deng ji wan tê.
Heta doh jî mirov bi saxî hatin rizgarkirin.
Naxwe eger ji destpêkê ve karek baş bihata kirin wê gelek mirov bihatana rizgarkirin.
Lê mixabin ji ber wan kêmasiyan bi deh hezaran mirovî jiyana xwe ji dest dan.”
Parlamentera HDP’î Mûazzez Orhan behsa negihandina alîkariya bo mexdûran jî kir û wiha bi dawî kir:
Hîna li navçeya Îslahiyeyê ya Dîlokê kehrebe û av tune ye. Pêwîstî bi konan jî heye.
Destpêkê jimarek kon hatin lê têrê nekir. Pêwîste kon werin.”
