Li asoyên Ukrayna, dawiya şer xuya nake.
Li herêma Donetsk careke din tevgera leşkerî zêde bûye.
Artêşa Ukrayna îdia dike ku li hinek eniyên şer 100 heta hezar û 600 metre bipêş de çûne.
Ukrayna bi hemû hêza xwe hewil dide, herêmên Rûsya kontrol kirî vegerîne.
Ji bo vê yekê li herêmên difikire ku Rûsya lewaze, êrişên xwe dijwar kiriye.
Alîkara Wezîra Parastinê ya Ukraynayê Hanna Maliar diyar kir ku leşkerên wan li Bahmutê ku yek ji bajarên şer lê dijwar bûye bi pêş ketine.
Demek dirêj dihat çaverêkirin ku leşkerên Ukraynayê li dijî êrîşan dest pê bikin.
Lê belê rayedarên Ukraynayê diyar nekir ku çalakiya leşkerî ya li Bahmutê tê vê wateyê yan na.
Li aliyê din Rûsyayê îdia kir ku wan êrîşeke nû li Donetsk ku ew jî li rojhilatê Ukraynayê ye û di bin kontrola cudaxwazên Rûsyayê de ye, pûç kir.
Bahmut bi mehan e di navenda şer de ye.
Bajarê ku ne xwedî girîngiyeke mezin a stratejîk bû, weke nuqteyeke sembolîk a şer girîng bûye.
Heta niha îdîayên Ukrayna û Rûsya yên têkildarî vî bajarî de bi awayekî serbixwe nehatiye piştrastkirin.
Ukrayna: Leşkerên me di gelek aliyan de pêş de çûn e
Alîkarê Wezîrê Parastinê Maliar di daxuyaniyekê de li ser medyaya civakî got:
“Tevî berxwedana dijwar û hewldanên dijmin ji bo parastina pêgeha xwe, yekîneyên me yên leşkerî di gelek aliyan de pêşde çûn.”
Li gorî daneyên ku hatine ragihandin, leşkerên Ukraynayê li gelek nuqteyan ji 100 metre heta 1,6 kîlometreyan bipêşde çûne.
Herêma Donetskê ji destpêka şer ve bûye qada şerên herî dirêj û tund.
Di peyamek vîdyoyê de ku doh êvarî hate weşandin de, lîderê Ukraynayê Zelensky spasiya leşkerên Ukraynayê kir ku “nûçeyên çaverêkirî” li Bahmutê anîne.
Koma çekdarên Rûsî Wagner ragihand ku di dawiya meha Gulanê de bajar kontrol kiriye.
Ev demek bû ku li dijî êrîşa Ukraynayê ya mezin dihat pêşbînîkirin.
Lêbelê, rêveberiya Kîevê diyar kir ku ev yek dê pêşwext neyê ragihandin.
Tevgera leşkerî ya li herêmê bû sedema nîqaşên ku dibe ku tevgera navborî dest pê bike.
Kremlîn: Di şerê li donetsk de 250 leşkerên Ukrayna hatin kuştin
Li aliyê din Wezareta Parastinê ya Rûsyayê ragihand ku li Donetskê êrîşeke nû hatiye şikandin û îdia kir ku di êrîşê de leşkerên Ukraynayê derbeyên giran xwarine.
Kremlînê îdia kir ku di şer de 250 leşkerên Ukraynayê hatin kuştin û 16 tank jî nekarîne bên bikaranîn.
Çavkaniyên leşkerî yên Ukraynayê ji Reutersê re gotin:
“Ti agahiyeke wiha li ber destê me nîn e û em agahiyên derew şîrove nakin.”
