Berdevkê Yekitiya Parêzeran a Herêma Firatê Mistefa Muslim eşkera kir ku Rêveberiya Xweser ji bo nîqaşkirina mekanîzmaya darizandina çeteyên DAIŞ′ê yên biyanî bi Yekitiya Parêzeran a Bakur û Rojhilatê Sûriyeyê re civiyaye û got: ”Me li ser girîngiya dîtina formeke di qada navneteweyî de tê qebûlkirin li hev kir.
Rêveberiya Xweser a Bakur û Rojhilatê Sûrî 10’ê Hezîranê ragihandibû ku dê dest bi darizandina DAIŞ’iyan bike.
Berdevkê Yekitiya Parêzeran a Herêma Firatê Mistefa Muslim derbarê darizandina çeteyan de axivî.
Muslim diyar kir ku biryara Rêveberiya Xweser a darizandina çeteyên DAIŞ′ê hinekî dereng maye û got:
“Diviyabû hemwextî têkbirina çeteyan ev dadgehkirin çêbiba.
Ji ber ku Rêveberiya Xweser gelek caran bang li welatan kir ku hemwelatiyên xwe yên DAIŞ’î werbigirin.
Tevî wê jî deng ji kesî nehat. Şandeyên welatan ku dihatin jî tenê jin û zarokên malbatên DAIŞ’ê werdigirtin.
Lê yên di nava DAIŞ`ê de wernedigirtin.”
Muslim anî ziman ku divê çeteyên DAIŞ`ê li gorî qanûnên navneteweyî bên darizandin û wiha dewam kir:
“Ji ber ku kesên bên dadgehkirin ji nasnameyên cuda ne.
Dê mekanîzmayek bê dîtin, ji bo ku her kes li gorî qanûneke adil û tevahî cîhan li serê li hev dike, were darizandin.”
”Rêveberiya Xweser li ser darizandina çeteyan bi parêzeran re civiya”
Muslim anî ziman ku Rêveberiya Xweser bi Yekitiya Parêzeran re civiya ye.
Û der barê cihê darizandinê û mekanîzmaya wê de nîqaş bi parêzeran re kir.
Muslim eşkera kir ku wan li ser girîngiya dîtina formeke di qada navneteweyî de tê qebûlkirin, li hev kirine da ku piştre tu pirsgirêk dernekevin.
Mistefa Muslim têkildarî beşdarbûna malbatên kesên ku ji DAIŞ`ê zirar dîtine di wan dadgehan de jî ev tişt anî ziman:
“Ji bo dadgehkirin bi awayekî adilane be, temsîlkirin û beşdarbûna wan malbatan an dê bi beşdarbûna şexsî (yekser) yan jî bi rêya wekîlên qanûnî mîna parêzeran be.
Bawer im ku dê derfet li pêşiya yekitiyên parêzeran ên Ereban û cîhanê jî bê vekirin da ku beşdarî van darizandinan bibin.”
