Ji rêveberên pêkhateyê Şîa li Şengalê, Ebdullah Elî dibêje: ”Koordînasyona Hêz û Pêkhateyên Neteweyî ji bo ku em bi hev re pirsgirêkên xwe çareser bikin hatî avakirin. Ebdullah Elî bang li Şengaliyên li derve kir ku vegerin ser axa xwe.
Li Şengalê Koordînasyona Hêz û Pêkhateyên Neteweyî hatiye ragihandin.
Hemû pêkhateyên li Şengalê dijîn cihê xwe di nava vê koordînasyonê de girtine.
Ji rêveberên pêkhateyê Şîa Ebdullah Elî ku di nava Koordînasyonê de cîh digire axivî û got:
”Ev Koordînasyon ji hemû pêkhateyên di nava Şengalê de dijîn hatiye avakirin.
Li ser esasê daxwaza mafên xwe li Şengalê ev koordîne hatiye çêkirin.
Armanca avakirina wê ew e ku em bi hev re pirsgirêkên xwe çareser bikin.
Ebdullah Elî: Divê em yekîtiya xwe xurt bikin
Ebdullah Elî bal kişand ser girîngiya yekîtiya netewî û wiha axaftina xwe domand:
“Ji destpêka ku hikumeta nû hatiye avakirin me koordînasyona xwe çêkir.
Hevdîtinên me jî bi serokkomar, serokwezîr û serokê parlemanê re çêbûn.
Ji bo em koordîneya xwe hîn xurtir bikin dawetname ji bo hemû hêzên li Şengalê re hat şandin.
Yek ji wan hêzan jî Heyder Şeşo bû, lê dawetiya me ji aliyê wan ve bê bersiv ma.
Deriyê hemahengiya me ji her kesê bixwaze axa xwe biparêze re vekiriye.
Em amade ne mil bidin hev û li hemberî dijminan bisekinin.”
Elî: Bila PDK’ê bizane ku Şengal ne Şengala berî fermanê ye
Elî bibîr xist ku Şengal ne ew Şengala beriya fermanê ye û wiha pê de çû:
“Daxwaza PDK’ê ye ku ew bibe desthilatê Şengalê.
Lê divê PDK’ê viya pir baş bizane ku Şengal ne ew Şengala beriya fermanê ye.
Ew dixwazin Şengal weke berê bi rêve biçe, lê tiştek weke xwe nemaye.
Milet dixwaze vegerin ser cih û warê xwe û jiyaneke aram jiyan bikin.”
Elî bang kir: Hemû Şengaliyên li derve divê vegerin
Ebdullah Elî di dawiya axaftina xwe de ev bang li gel kir:
“Hêvî û daxwazên me ji miletê me ew e ku her kes bila vegere ser cih û warê xwe.
Her roj di nava kampên li Başûrê Kurdistanê de agir bi çadiran dikeve.
Li şuna ku li wê derê di çadiran de bijîn, bila werin ser erdê xwe bijîn.”
