Endamê Komîteya Rêveber a KCK’ê Mûstafa Karasû diyar kir ku PDK’ê ji bo têkoşîna çar beşên Kurdistanê bitepisîne bi dewleta Tirk re hevkariyê dike. Ji bo gelê Kurd û rewşenbîran got ku divê PDK’ê re bêjin êdî bese, bangawaziyan berdin çalakiyan bikin.
Endamê Komîteya Rêveber a KCK’ê Mûstafa Karasû di bernameya taybet a televîzyona Medya Haberê de li ser hevkariya PDK’ê ya bi dagirkeriya Tirkiyê nirxandin kir.
Mûstafa Karasû diyar kir ku êdî PDK’ê were rawestandin û ev tişt anî ziman:
“Îro li hemberî hemû destkeftiyên Kurdan êrîş hene û PDK’ê hevkarê van êrîşan e.
Di vê mijarê de êdî em xwe nexapînin, dem derbas nekin.
Bi rastî jî êdî divê ev sekna PDK’ê were rawestandin.
Karasû: Ji bo rawestandina PDK’ê pêwîstî bi çalakî û helwestekê heye
Gelê Kurd û rewşenbîr hemû divê ji PDK’ê re bibêjin raweste, divê êdî dev ji bangan berdin.
Ji bo rawestandina PDK’ê pêwîstî buyerek, çalakiyek, helwestek heye.
PDK’ê ji bo tasfiyekirina têkoşîna ya her çar beşan bi dewleta Tirk re hevkariyê dike. Ev eşkere ye.”
Karasû da zanîn ku dewleta Tirk li Bakur polîtîkaya qirkirinê dimeşîne, lê ji bo PDK’ê ti wate û giringiyek vê qirkirinê nîne.
Mûstafa Karasû: PKK’ê nebûya wê îro statûya Başûr jî nebûya
Mûstafa Karasû bibîrxist ku heger PKK’ê nebûya statûya Başûr îro jî nedibû û ev nirxandin kir:
“Divê partiyên li Başûr hemû vê rastiyê bizanin. Yên ku Başûr îro diparêzin em in.
Ku têkoşîna me ya giştî nebûya îro li holê wê li Başûr jî nebûya.
Ji ber vê yekê, parastina Başûr nayê wê wateyê ku em çavên xwe li hemberî xiyaneta PDK’ê bigirin.
Karasû: PDK’ê dixwaze hemû Kurdan ji bo desthilata sê bajaran bifroşe
PDK’ê dixwaze hemû Kurdan ji bo desthilata sê bajaran bifroşe.
Di bin navê parastina Başûr de, tê xwestin ku îxanet û hevkariya PDK’ê were rewakirin.
Êdî divê dev ji vê berdin, ev ne welatparêziye û rewşenbiriya Kurd e.
Divê rastî were dîtin, dema êrîş li Başûr hat kirin, PDK’ê berda û reviya.”
Mûstafa Karasû: Heger wiha bidome wê PKK’ê û PDK’ê werin li hemberî hev
Endamê Komîteya Rêveber a KCK’ê Mûstafa Karasû di nirxandinê xwe de hişyariyan kir û da zanîn ku PDK’ê pêvajoyê zêdetir provoke dike û wiha got:
“Heger wiha berdewam bike wê PKK’ê û PDK’ê werin li hemberî hev.
Vekirî bibêjim, her kesên ku van polîtîkayên PDK’ê normal û rewa dibînin heya niha helwestek vekirî nîşan nedane wê berpirsê vê yekê bin.”
