Li ser banga xelkê herêmê Hêzên Sûriya Demokratîk QSD’ê di 27’ê Tebaxê de dest bi operesyona ‘Xurtkirina Ewlehiyê’ kirin.
Ev operesyon li seranserî herêmê bi çalakiyên cur bi cur rastî piştgiriyeke mezin tê.
Operasyona ‘Xurtkirina Ewlehiyê’ ya ku ji bo paqijkirina herêmê ji şaneyên DAIŞ’ê û bazirganên hişbirê hatî destpêkirin dewam dike.
Ji dema destpêkirina operesyonê de û heya niha hewl tê dayîn ku fitne di navbera gelê herêmê û QSD’ê de were derxistin.
Pêkhateyên herêmê jî ji Kurd, Ereb, Suryan, Tirkmen li dijî vê plana qirêj di nava çalakiyan de ne û banga hevgirtin û yekîtiyê dikin.
Şêniyên Girkê Legê bi meşekê piştgiriya QSD’ê kirin
Ji bo piştgiriya bi Operesyona QSD’ê û li dijî fitneyan şêniyên Girkê Legê bi girseyî daketin qadan û meşek li dar xistin.
Piştî meş veguherî mêtingê gelek kes axivîn û îşaret bi rola QSD’ê ya di pêkanîna ewlehiya li herêmê de kirin û wiha hate gotin:
“QSD’ê ji bo parastina me ev operesyon daye destpêkirin û em jî wekî gelê herêmê heya dawiyê li pişta wan bin.
Em bang li tevahî pêkhateyan dikin ku li ber hemû fitneyan rabin û bibin yek.
‘Li hember fitneyan yekîtî û hevgirtina xwe xurt bikin’
Li Reqayê jî şêx, rûspî û endamên saziyên sivîl û meclisên gel ên bajêr kom bûn û daxuyaniyek dan.
Daxuyanî ji aliyê şêxê eşîra El Sebxe Tirkî El Suan ve hate xwendin.
Şêx El Suan di daxuyaniyê de wiha got:
“Em xelkê Reqayê li kêlka QSD’ê ne ku ji bo pêkanîna ewlehî û aramiya herêmê bi hezaran şehîd dane û hê jî dide.
Em bang li tevahî gelê xwe û bi taybet yê li Dêra Zorê dikin ku nekevin xefka planên dijmin û yekîtî û hevgirtina xwe xurtir bikin.
‘Em ê xwedî li hêz û destketiyên xwe derkevin’
Xelkê rojavayê Dêrazorê û gelek endamên sazî û rêxistinan jî li bajarokê Kîsrat daxuyaniyek dan û ev tişt gotin:
“Hemwextî Operasyona ′Xurtkirina Ewlehiyê′ ji ber destwerdana destên veşartî û belavkirina nûçeyên derew hewl tê dayîn ku fitne werin derxistin û projeya biratiyan gelan a li herêmê derb bikin.
Lê em ji her kesî re radighînin ku ev lîstok dê li ser gelê herêmê neyê meşandin û em ê xwedî li hêz û destketiyên xwe derkevin.”
Meclisa Malbatên Şehîdan a Dêrazorê piştgirî da QSD’ê
Meclisa Malbatên Şehîdan ya li rojavayî Dêra Zorê jî de daxuyaniyek da û wiha got:
“Gelê li vê herêmê bi salan e bi hev re dijîn û li hember her cure êriş û fitneyan sekinîne û şer kirine.
Vê carê jî dê ev gel li pişta hêzên xwe bin û li hember êriş û fitneyan bisekinin.
