Hêviyên dirêjbûna dema agirbesta navbera Îsraîl û Hemasê zêde ne.
Lê hemwextî van hêviyan Serokwezîrê Îsraîlê Netanyahu diyar kir ku piştî agirbestê wê êrîşên li dijî Hemasê bidomin.
Hêviyên ku agirbesta demkî ya 4 rojan a di navbera Îsraîl û Hamasê de bê dirêjkirin zêde dibin.
Serokwezîrê Îsraîlê Benjamin Netanyahu li ser mijarê bi Serokê Dewletên Yekbûyî yên Amerîka DYA Joe Biden re axivî.
Netanyahu di daxuyaniya xwe ya piştî axaftinê de, diyar kir ku di peymana agirbestê de egeriya dirêjkirina agirbestê heye.
Ev yek jî di berdêla azadkirina her roj deh dîlên din de tê pêşbînîkirin.
Netanyahu got; Piştî agirbestê wê êrîş ji nûve dest pê bikin û Îsraîl wê bi hemû hêza xwe di şerê bi Hemasê re bigihêje armancên xwe.
Hemas alîgirê dirêjkirina agirbestê ye
Hat ragihandin ku Hemas jî alîgirê dirêjkirina agirbestê ye.
Misir û Qeter yên navbeynkariyê dikin jî diyar kirin ku Hemas û komên çekdar ên Filistînî ji bo dirêjkirina agirbestê û azadkirina 20-40 girtiyên Îsraîlî amade ne.
Serokê Amerîkayê Joe Biden got;
Ew hêvî dike ku agirbesta li Şerîda Xezayê were dirêjkirin.
Colonna: Divê agirbest bê dirêjkirin
Wezîra Karê Derve ya Fransayê Catherine Colonna di daxuyaniya xwe ya ji bo BFM TV de diyar kir ku divê agirbest bê dirêjkirin û ev yek weke “baş, çareserî û pêwîst” pênase kir.
Îsraîl û Hemasê bi navbeynkariya Qeter, DYA û Misrê li ser agirbesteke 4 rojan li hev kiribûn.
Qeter: Hemas bi Hêsanî nayê tunekirin
Ji navbeynkarên agirbestê Serokwezîrê Qeterê û Wezîrê Karê Derve Muhemmed bin Ebdurrahman el Sanî ji rojnameya AElman Frankfurter Allgemeine Zeitung re axivî.
Wezîr di daxuyaniya xwe de anî ziman armanca Îsraîlê ya îmhakirina Hemasê hema bêje nepêkane û wiha got:
“Hemas bi wê rehetî nayê îmhakirin.
Em razî bin jî nebin jî (Hamas) beşeke civaka li Xezze û Şerîeya Rojava ye.”
Wezîr her wiha diyar kir ku Qeterê ji bo aştî û îstiqrarê li herêmê misoger bike bi Hemasê re têkilî danîye.
Serokomarê Almanya li Îsraîlê ye
Ji aliyê din ve Serokomarê Almanyayê Frank-Walter Steinmeier wê serdana xwe ya ji bo Îsraîlê ku duh dest pê kiribû bidomîne.
Steinmeier wê bi Serokwezîrê Îsraîlê Netanyahu re hevdîtinê bike û li Qudsa Rojhilat wê serdana nexweşxaneyeke ku Filistînî lê tên dermankirin bike.
Li Sierre Leone yê Rojavayê Afrîkayê êrîşî leşkergehekî hat kirin
