Ev çend roje her em behsa şehba û dorpêçe ku li ser tê meşandin dikin.
Dorpêça Hikumeta Şamê ya li ser kantona Şehbayê û herdû taxên Helebê êdî rewşa jiyanî ya li herêmê metirsîdar dike.
Li herêmê nexweşxane di rewşa awerte de dixebite û perwerde hatiye rawestandin.
Hikumeta Şamê dorpêça li ser kantona Şehbayê û taxên Şêxmeqsûd û Efşrefiyê yên Helebê giran kiriye.
Nahêle ku pêdiviyên sereke weke sotemenî, derman û şîrên zarokan derbasî herêmê bibin.
Dorpêç rasterast bandoreke neyinî li tevahî qadên jiyanê kiriye.
Li Şehbayê ji ber tunebûna sotemeniyê Desteya Perwerde û Hîndekariyê ya Kantona Efrîn û Şehbayê biryara rawestandina perwerdeyê da.
Li Şehbayê 14 hezar û 500 xwendekar ji perwerdeyê bê par mane.
Li gorî Desteya Tenduristiyê ya Kantona Efrîn û Şehbayê, Nexweşxaneya Avrîn di rewşa awerte de dixebite.
Tunebûna mazotê jî hişt gelek beş di nexweşxanê de nexebitin.
Li ser nexweşxaneyê kehrebe qut kirine, tenê ji bo beşa çavdêriya taybet heye.
Li gorî Desteya Tenduristiyê erebeyên nexweşxaneyê jî hatine rawestandin û derman jî nayên peydakirin.
Nexweş jî neçar dimînin dermanan ji derve dikirin, ew jî gelekî biha ne.
Ev rewş jî hefteyek e berdewam e.
Li Şêxmeqsûd û Eşrefiyê xebatên xizmetguzariyê hatin seknandin
Ji ber vê dorpêça giran, Şaredariya Gel a taxên Şêxmeqsûd û Eşrefiyê yên Helebê daxuyaniyekî awerte da.
Şaredariyê ji ber dorpêça hikumeta Şamê, tevahî xebatên xizmetguzariyê heta demeke nediyar taloq kirin.
Di daxuyaniyê de hate diyarkirin ku hikumeta Şamê siyaseta birçîkirinê li dijî şêniyên her du taxan û herêmên Şehbayê dimeşîne.
Armanca wê şikandina vîna gel û koçberkirina wan e.
Hat destnîşankirin ku koçberên Efrînê, ji 6 salan ve di nava dorpêçekê de ne ku dê bi xwe re felaketeke mirovî ya rastîn bîne.
Hat gotin, ji ber dorpêça hikumeta Şamê ya ku nahêle xwarin, çîmento, sotemenî, werşeyên sererastkirinê yên saziya avê û kehrebeyê derbasî her du taxan bibin, xebatên şaredariyê heta demeke nediyar hatine taloqkirin.
