Neteweyên Yekbûyî, piştî şerê ku bi mehan e didome diyar kir ku ji 17 mîlyonan zêdetir mirov nagihêjin xwarinê.
Bang kir ku ji bo têkoşîna li hember qeyrana xwarinê ya Sûdanê ji 75 mîlyonî zêdetir alîkarî bê kirin.
Rêxistina Xwarin û Çandiniyê ya Neteweyên Yekbûyî (FAO) li ser zêdebûna qeyrana xwarinê ya li Sudanê ji çapemeniyê re daxuyanî da.
FAO ji ber rewşa qeyranê hişyarî da û ev bang kir:
“Ji bo pêşîgirtina bobelata mirovî ya ku nêz dibe, divê bi lez û bez tevgerek hebe.”
Li gorî pêşbîniyan 17.7 mîlyon mirov, ango ji sedî 37’ê nifûsê, wê heya Sibata 2024’an bi astên bilind ên bê ewlehiya xwarinê re rûbirû bimînin.
Ji meha Nîsanê û vir ve, di navbera hêzên fermandarê artêşê Abdulfetah el-Burhan û hêzên piştevaniya bilez a paramîlîter (HDK) de ku cîgirê wî yê berê Muhamed Hamdan Daglo fermandariya wê dike, şerê desthilatdariyê tê jiyîn.
Li gorî texmînên muhafezekar ên Projeya Daneyên Pevçûn û Bûyerên Çekdar, zêdetirî 12 hezar kes hatine kuştin, di heman demê de Neteweyên Yekbûyî diyar dike ku nêzî 6,8 mîlyon kes neçar mane ku malên xwe biterikînin.
Di daxuyaniya FAO’yê de ev tişt hat gotin:
“Şerê çekdar û tundiyê her ku diçe li gelek herêman qeyrana mirovî kûrtir dike û ewlehiya xwarinê ya gel xerabtir dike”
Her wiha hat destnîşankirin ku herêmên herî zêde zirar dîtine Darfûr, Kordofan û Hartûm e.
Ji ber vê yekê FAO bi lezgînî 75,4 mîlyon dolar daxwaz dike ku bi taybetî alîkariya pêşxistina hilberîna çandiniyê ya herêmî bike.
Li gorî daxuyaniya çapemeniyê, FAO di navbera Tîrmeh û Îlona 2023’an de, bi taybetî bi belavkirina tovan, ji zêdetirî mîlyonek malbatên cotkar (5 mîlyon kes) re alîkar bû.
