Artêşa Îsraîlê ragihand ku li Şerîda Xezeyê ku şerê dijwar lê diqewime 3 girtiyên di destê Hemasê de bi şaştî hatine kuştin.
Li Xan Yûnûsê jî kameramanekî Al Jazeera di êrîşa hewayî de hat kuştin.
Piştî kuştina dîlan û rewşa dawî, li ber Wezareta Parastinê ya Îsraîlê gel kombûn û hêrsa xwe nîşan dan.
Artêşa Îsraîlê ya ku operasyonên xwe yên li Şerîda Xezayê didomîne ragihand ku bi şaşî 3 dîlên destê Hemasê de kuştine.
Di daxuyanîya ku ji alyê artêşê ve hat dayîn de hat destnîşankirin ku “Di şerê li Şucêyyeyê de yekîneyên artêşê 3 dîlên Îsraîlî bi şaştî wek gef dîtine û di encama gulebaranê de jiyana xwe ji dest dane.”
Cenazeyên dîlên hatîn kuştin derbasî Îsraîlê bûne û navê wan jî hatine eşkerekirin.
Ew jî; Yotam Haim, Alon Şamriz û Samer El-Talalka ye.
Berdevkê artêşa Îsraîlê Danîel Hagarî diyar kir ku hîn ne diyar e ku dîl ji destê Hamasê reviyane yan jî ji aliyê rêxistinê ve hatine hiştin.
Hamasê di êrîşên 7’ê Cotmehê de bêtirî 200 kes dîl girtin.
Heta niha 110 kes hatine berdan.
105 ji wan di berdêla serbestberdana hin Filistîniyên di girtîgehên Îsraîlê de hatin rizgarkirin, cenazeyên 8 dîl hatin teslîmkirin.
Beriya bûyera dawîn a ku 3 dîl bi şaştî hatin gulebarankirin, li gorî hesabê AFP’ê jimara dîlên destê Hemasê de 113 e ne.
Hat diyarkirin ku ji wan 103 welatiyên Îsraîlî yan jî hemwelatiyên du welatanin.
Her wiha 8 jê Taylandî, yek jê Nepalî û yê din jî Meksîkî ye ku bi eslê xwe Fransî ye.
Li nava Îsraîlê kuştina dîlan rê li ber nerazîbûnê vekir
Piştî kuştina dîlan li nava Îsraîlê bertekên li dijî hikumetê zêde bûn.
Girseya gel li ber Wezareta Parastinê kom bû û ji bo serbestberdana dîlên di destê Hemasê de lihevkirinek nû xwestin.
Li Xan Yûnûs kameramanê Al Jazeera hat kuştin
Di êrîşa balafirên bêmirov ên Îsraîlê ya li hemberî Xan Yûnûs a li Xezeyê de kameramanekî Al Jazeera jiyana xwe ji dest da û nûçegihanê El Cezîrê û berpirsyarê Buroya Xezeyê Wael Dahdûh birîndar bû.
Li gorî El Cezîrê, kamereman Samer Ebû Deqqa doh dema li Xan Yûnûsê rewşa filistîniyan dişopand di encama êrişek balafirên bêmirov de jiyana xwe ji dest daye.
Li gorî daxuyaniya Komîteya Parastina Rojnamegeran (CPJ) li Xezeyê heta niha 63 rojnamegeran ji ber êrîşan jiyana xwe ji dest dane.
