Kongra Star bi daxuyaniyeke destnîşan kir ku Neteweyên Yekbûyî li dijî sûcên şer û êrîşên dagirker yên dewleta Tirk bêdeng dimîne û nerazîbûn nîşan da.
Kongra Star bang li NY’ê kir ku nebe hevkarê sûcên şer yên dewleta Tirk û rolê xwe ku ji destpêka aloziya Sûrî ve jê direve bi cîh bîne.
Evîn Sweed, li ser navê Koordînasyona Kongra Star, bi xîtabê Sekreterê Giştî yê Neteweyên Yekbûyî Antonio Guterres daxuyaniyek weşand.
Kongra Star destnîşankir ku êrîşên dagirker yên dewleta Tirk dewam dikin, lê tevî vê yekê NY ku xwedî 193 welatên endam e, ji bo rawestandina dagirkeriyê ti daxuyanî nedaye û qanûnên ewlekariya navnetewî nexistiye dewre.
Di daxuyaniyê de hat diyarkirin ku ev wê bibe yek ji binketina herî mezin ya NY û weha hat gotin:
“Bi awayekî rojane çeteyên dewleta Tirk êrîşî gundan dikin, jinan direvinîn, xelkê herêmê ji cih û warên wan qut dikin û neçarî koçberiyê dikin. Lê di rewşeke weha de NY tenê berpirsyariya xwe bi alîkariya maddî sînordar dike.”
NY PIŞTA ZALIMAN GIRT Û ROLA XWE NELEYIST
Kongra Star anî ziman ku NY tevî ku dikarîbû ji bo çareseriya pirsgirêkên Suriyê, Rojhilata Navîn û demokratîkbûnê rol bilîze lê belê weke ku di dagirkeriya Efrînê de jî kiribû, di êrîşên li ser Serê Kaniyê û Girê Spî de jî pişta zaliman girt û ev firsenda dîrokî jinedîtî ve hat.
Koordînasyona Kongra Star her weha anî ziman ku weke jin ji ber daxuyaniyên Sekreterê NY Guterres ku piştî civîna bi Erdogan re kiribûn û sûcên mirovahiyê, plana guhertina demografîk ya dewleta Tirk erê kiribûn bi tirs û fikar, bi hêrs in û vê helwestê şermezar dikin.
Kongra Star gotina Sekretere NY ku gotibû divê koçberên Sûriyê yê li Tirkiye bi daxwaza xwe, bi ewle û bi rûmet vegerin bibîrxist û ev pirs kir:
QEDERA GELAN NEKIN QÛRBANÊ BERJEWENDIYAN
“Gelo hun çima bi heman rengî naxwazin ku bi hezaran kesên ku ji Serê Kaniyê, Girê Spî û Til Temirê ku bi darê zorê ji cih û warên xwe hatine derxistin bi daxwaza xwe, ewle û bi rûmet vegerin malên xwe? Bi vê korbûna vîcdanê hun nikarin pirsgirêkan çareser bikin.”
Kongra Star bang li NY kir ku qedara gelan neke qurbanê peymanên bazirganiyê, bê alî tevbigere, ji bo rastiya li herêmê lêkolîn bike heyeteke pispor bişîne Girê Spî û Serêkaniyê û di komîteya Destûra nû ya Sûriyê de cîh bidin nûnerên Kurdan jî.
