Bîlançoya şerê Hemas û Îsralê giran dibe.
Di nava 24 saetên dawiyê de, li Xezayê 165 kesên din hatin kuştin.
Ji destpêka şer heta niha zêdeyî 25 hezar Filistînî û 531 leşkerên Îsraîlê hatine kuştin.
Guterees dibêje divê her kes mafê avakirina dewleta Filistînê nas bike, Biden jî pêşniyara avabûna dewleta Filistînê ya bê artêş kir.
Netanyahê jî dibêje ew bi ti awayî avakirina dewleteke Filistinê qebûl nakin.
Şerê Hemas û Îsraîlê di roja 107’an de bi dijwarî didome û bîlançoya şer jî roj bi roj giran dibe.
Hat ragihndin îro ber destê sibê hêzên Îsraîlê li Xan Yunus ya li başûrê Xezayê êriş pêk anîye û di encamê de gelek kes hatine kuştin û birîndar bûne.
Di êrişên Îsraîlê de li Xezayê 165 kesên din hatin kuştin
Her wiha hat diyar kirin balafirên şer yên Îsraîlê kampa penaberan ya Cîbaliyê jî bombebaran kirin e.
Li gorî daxuyaniya Wezareta Tenduristiyê ya Xezayê di êrişên Îsraîlê yên li dijî Xezayê de, di nava 24 saetên dawiyê de 165 Filistînî hatine kuştin û 280 jî birîndar bûne.
Li Xezayê hejmara kesên hatine kuştin 25 hezar derbas kir
Her wiha li gorî Wezaretê Tenduristiyê ji 7’ê Cotmehê û vir ve li Xezayê piraniya wan jin û zarok 25 hezar û 105 Fîlîstînî hatine kuştin û 65 hezar û 681 kes birîndar bûne.
Di şer de heta niha 531 leşkerên Îsraîlê hatine kuştin
Artêşa Îsraîlê jî ragihand ku di şerê li başûrê Xezayê de, leşkerekî wan hatiye kuştin û 3 jî bi giranî birîndar bûne. Artêşê ragihand ku di 24 saetên dawî de 16 leşkerên wan birîndar bûn.
Hat ragihandin ji destpêka şer heta niha 531 leşkerên Îsraîlî hatine kuştin.
DYA: Li Xezayê ji sedî 20-30 endamên Hemasê hatin kuştin
Li gorî îstîxbarata Amerîkayê hêzên Îsraîlê di şerê Xezayê de ji sedî 20-30 endamên Hemasê kuştine.
Li gorî nûçeya Wall Street Journal ev hejmar gelek ji armanca Îsraîlê ya tunekirina Hemasê dûre.
Guterees: Divê herkes mafê avakirina dewleta Filistînê nas bike
Li aliyê din niqaşên li ser avabûna dewleta Filistînê jî dewam dikin.
Sekreterê Giştî yê NY Antonyo Guterees ragihand ku divê her kes mafê avakirina dewleta Filistînê nas bike.
Guterres li paytexta Uganda Kampala di civînekê de axivî û got:
“Ji bo Îsraîl û Filistînê ne-qebûlkirina çareseriya du dewletî û redkirina mafê dewletê ya gelê Filistînê nayê qebûlkirin.”
Netanyahû, pêşniyara Biden ya dewleta Filistînê a bê artêş red kir
Li aliyê din serokê Amerîkayê Joe Biden û serokwezîrê Îsraîlê Binyamîn Netanyahû bi telefonê hevdîtin pêk anîn.
Biden di hevdîtinê de pêşniyara avakirina dewleta Filistînê ya bê artêş kir.
Serokwezîrê Îsraîlê Binyamîn Netanhayû jî careke din ragihand ku ew li dijî avakirina dewleta Filistînê ne.
