Endamên Foca Agirkujiyê ya Qamişloyê yên ku 14 şewatên di encama bombebarana dewleta Tirk a dagirker de çêbibûn, vemirandin wiha gotin:
“Li hemberî dijminekî ku ne exlaq û ne jî rêgezên mirovahiyê nas dike, me kar kir.
Şert û merc çi bin em amade ne, ji bo ku xetereyê ji ser gelê xwe rakin.”
Piştî êrişên dewleta Tirk a dagirker ên li dijî herêmê, tîmên agirkujiyê ketin seferberiyê.
Endamê Foca Agirkujiyê ya Qamişloyê Etiya Abas tevî 20 hevalên xwe 14 şewatên di encama bombebarana dewleta Tirk a dagirker çêbibûn, vemirandin.
Etiya Abas: Li hember dijminekî bê exlaq me kar dikir
Têkildarî mijarê Etiya Abas diyar kir ku hemû endamên focê amade bûn biçin her derê û got:
“Di şert û mercên herî dijwar de li hemberî dijminekî ku ne exlaq û ne jî rêgezên mirovahiyê nas dike, me kar kir.”
“Bi tevahî hêza xwe me hewl dida agirê gur bûye vemirînin”
Etiya Abas cihên ku şewat lê vemirandine bi bîr xistin û got:
“Me şewatên li nexweşxane, navendên hilberandina oksîjenê, çapxane, navend û saziyên xizmetguzariyê yên din, vemirandin.
Bi tevahî hêza xwe me hewl dida agirê gur bûye vemirînin.
Mîna şerekî bû, heta me karî em jê bi windahiyên herî kêm derkevin.”
Xalid El Mixlef: Li Kobanê tîmê agirkujiyê hatin armanckirin
Endamekî din ê focê Xalid El Mixlef jî detayên wê demê wiha bi bîr xist:
“Dema bombebaranê de erebeya agirkujiyê bi çend metreyan dûrî cihê ku hatibû bombebaran kirin disekinî.
Ji ber ku dibe dewleta tirk careke din bombebaran bike yan jî tîmê bike armanc mîna bûyera li Kobanê çêbû.
Di dema dawî de em pir westiyan ji ber ku her roj bombebaran hebû.”
Xalid El Mixlef: Em leşkerên nenas in
Xalid El Mixlef diyar kir ku wan şewatên ji Amûdê heta Qamişlo, stasyona Ude û Rimêlanê, vemirandin û got:
“Hin caran dema me li cihekî şewat vedimirand, agahî ji me re dihat ku cihekî din hatiye bombebaran kirin.
Em leşkerên nenas in, şert û merc çi bin em amade ne, ji bo ku xetereyê ji ser gelê xwe rakin.”
Hisêm Mihemed: Di karê me de her tim em di seferberiyê de ne
Endamê rêveberiya Foca Agirkujiyê Hisêm Mihemed jî li ser karê tîmê axivî û got:
“Di karê me de her tim em di seferberiyê de ne.
Tîmên me jî li gorî wê 24 saetan hazir in ji bo ku biçin bi hewara gel ve.
Hevalên me bi rihekî fedaî kar kirin.
Em ê her dem li ser karê xwe bin û parstina xelkê herêmê û saziyên wê bikin.”
