Fermandariya Biryargeha Navendî ya YJA Starê bi boneya 8’ê Adarê daxuyanî da û got: “Ji bo em vê biharê bikin destpêka bihara jinê û ji sîstema bi serdestiya mêr re bêjin ‘RAWESTE’, bi dirûşmeya ‘Jin, Jiyan, Azadî’ em berxwedanê bikin bingeha jiyana xwe.”
Fermandariya Biryargeha Navendî ya YJA Starê bi wesîleya 8’ê Adarê Roja Jin a Cîhanî daxuyaniyeke nivîskî da.
Fermandariya Biryargeha Navendî ya YJA Starê di daxuyaniyê de anî ziman ku 8’ê Adarê sembola jina berxwedêr e ku zîhniyeta mêr a li hemberî jinê eşkere dike.
YJA Star: Divê hemû jin bibin xwedî hişmendiya YJA Starê
YJA Starê di daxuyaniyê de da zanîn ku Hêza jina pêşeng a ku îro 8’ê Adarê gihandiye wateya wê ya rasteqîn Tevgera Jinê ya Azad e û got:
“YJA Star ji bo hemû jinên Kurdistanî û jinên li Rojhilata Navîn û cîhanê bûye hêvî.
Bi mîrateya xwe ya berxwedanê ya zêdeyî 30 salan ji bo jinan bûye modela xweparastinê, li dijî mejiyê mêr ê qetlîamkar, hêza herî mezin a xweparastinê ya jinê ye.
Lewma banga me ji bo hemû jinan ew e ku li ser xeta jinê ya azad bibe xwedî hişmendiya YJA Starê û li ser rêya jinê ya YJA Starbûyînê em bi hev re bimeşin.”
YJA Star: Heta ku jineke bi tenê bêrêxistin nemîne em têkoşînê dewam bikin
YJA Starê di daxuyaniya xwe de destnşan kir ku têkoşîna azadiya jinê ku rêbertî weke karekî destanî pênase kir, rê li ber ‘Xwebûnê’ vekir û got:
“Ji ber vê jî girîng e jin her qada ku lê ne veguherînin çepera berxwedanê ku ev yek tê wateya qedandina mejiyê mêr ê desthilatdar.
Rêya vê yekê jî rêxistiniya xurt e.
Her jineke li derveyî jiyana rêxistinî dimîne, dibe hedefa hovîtiya mejiyê mêr û ji nasnameya xwe tê dûrxistin.
Bi vê têgihiştine, heta ku jineke bi tenê jî bêrêxistin nemîne divê em têkoşîna xwe dewam bikin.”
Yja Star: Em bi dirûşma ‘Jin, Jiyan, Azadî’ berxwedanê bikin bingeha jiyana xwe
YJA Star anî ziman ku ji bo em vê biharê bikin destpêka bihara jinê divê em berxwedana ‘Jin, Jiyan, Azadî’ esas bigrin û ev tişt got:
“Di vê em di 8’ê Adarê de bi dirûşma ‘Jin, Jiyan, Azadî’ dakevin qadan û biqîrin ku jiyaneke bê jinê qebûl nakin.”
YJA Starê di dawiyê de soza bilidkirina têkoşînê û pêkanîna armancên şehîdan da.
