Dewlet Tirk a dagirker li herêmên Sûrî yên dagir kiriye, komên çeteyên karê xwe pê qedandine lewaz dike yan jî tine dike.
Komên çeteyan ên vê rastiyê dizanin, vê carê xelkê li hev sor dikin.
Bûyer û aloziya dawî ya li Ezazê careke din vê rastiyê radixe ber çavan.
Di demên dawîn de li herêmên ku ji aliyê dewleta Tirk ve hatine dagirkirin, alozî û pevçûnên navbera çeteyan, zextên li ser xelkê herêmê û xwepêşandanên gel ên li dijî wan zêdetir bûne.
Şevê din li Ezazê dijî rêveberên komên çete ku dewleta Tirk weke hikumeta demkî dide naskirin, xwestin derbasî bajar bibin.
Nehiştin berpirsên çeteyan derbas bibin
Li wir qaşo serokê ‘Hikumeta Demkî’ Ebdurrehman Mistefa û Serokê Îtîlafê (Serokê Koalîsyona Neteweyî ya Hêzên Muxalefeta Sûriyeyê!) Hadî El Behra li gel komek çeteyan dema dixwestin derbasî bajar bibin, hatin protestokirin.
Di dîmenan tê dîtin ku xelkê herêmê nerazîbûnê nîşan dide, komên çete jî ketober guleyan li derdorê direşînin.
Lê çeteyan nekarî bi berdana guleyan û tirsê bi welatiyan paşde gavê bidin avêtin.
Hat gotin piştî bûyerê şandeyek ji artêş û îstîxbarata dewleta Tirk ên ji herêmên dagirkirî berpirsyar bi komeke qelebalix re derbasî herêmê bûne.
Ev şande bi komên çeteyan re hevdîtin kirine.
Beriya vê bi heman awayî xwepêşandan li Bab û Cerablusê jî pêk hatibûn.
Li gorî çavkaniyên herêmî, sedema bingehîn a nakokî û pevçûnan, şerê ji bo desthilatdariya talankirina herêmê ye.
Nakokiyên dewleta Tirk û çeteyan
Çavkaniyan destnîşan kir ku dewleta Tirk a dagirker, naxwaze tu komek çete ji bin kontrola wê derkeve.
Koma ku herî zêde bi dewleta Tirk re nakokiyan dijî, Heyet Tehrîr El Şam (HTŞ) e.
Her du alî gel li dijî hev sor dikin
Dewleta Tirk Tehrîr El-Şam wekî sedema êrişên Rûsya û hikumeta Şamê yên li ser herêmê nîşan dide û di nava xelkê herêmê de gotinên wekî “Êriş ji ber HTŞ’ê çêdibin, eger ew nebe, êriş nabin” derdixe û dixwaze gel li dijî wê derxe.
Çavkaniyan ragihand ku koma çeteyan a şevê din xwestiye derbasî Ezazê bibe jî, bi vê mebestê hatibû û dixwest bi komên li herêmê re têkildarî mijarê civînekê çêbikin.
Li hemberî vê Tehrîr El-Şam jî ketiye nava liv û tevgerê û xwe di nava xelkê herêmê de bi rêxistin dike.
Çavkaniyan diyar kir ku kesên duh xwepêşandan li dar xistine jî alîgirên WÊ bûne.
Li gorî agahiyên dawî, şandeya dewleta Tirk a dagirker a ku derbasî Ezazê bûye, ji komên çete yên girêdayî xwe xwestiye ku hemû kesên tev li xwepêşandanê bûne, bigirin.
Alozî û rageşiya li herêmê hîn jî didome.
