Desthilata AKP-MHP’ê yê di hilbijartinê de bi binketineke mezin re rûbirû man, hewil didin bi şerekî din şansê xwe yê dawî biceribînin.
Lewma li dijî Başûrê Kurdistanê û Rojava di nava pilanên nû de ne.
Zanyarê Siyasetê Sînan Onal diyar kir ku AKP hewl dide li herêma Garê zemîna êrîşeke nû biafirîne û got: “Ev plan jî wê ji ber têkçûna hilbijartinên 31’ê Adarê û krîza aborî bişikê.”
Hilbijartinên 31’ê Adarê yên li Tirkiyê piştî ku bi dawî bû êrişa li dijî Kurdistanê careke din ketiye rojeva dewletê.
Desthilata AKP-MHP’ê ku bi binketineke mezin re rûbirû man hewil dide bi şer rojevê biguherin.
Şefê faşîst yê TirkiyÊ Erdogan di daxuyaniya xwe ya şeva hilbijartinê de diyar kir ku wê êrişên li ser Başûrê Kurdistana û Bakur û Rojhilatê Sûriyê bidomin.
Zanyarê Siyasetê Sînan Onal, planên êrişên nû yên AKP’ê û MHP’ê û bandora hilbijartinê ya li ser vê rewşê nirxandin.
Sînan Onal: AKP-MHP wê li dijî Kurdistanê hêza xwe ya dawî biceribînin
Sînan Onal diyar kir ku Tirkiye li dû xeyalên Osmanîtiyê ye got:
“Tirkiye dixwaze li Sûriye, Iraq û Kurdistanê hegemonyaya xwe ava bike.
Tirkiye ji bo pêkanîna vê xwest ji nakokiyên di nava NATO û Şengayê de sûdê wergire.”
Sînan Onal: Dibe ku cihê êrişa Tirkiyê garê be
Onal destnîşan kir ku polîtîkayên Tirkiyê encam negirtine û wekî çareya dawîn jî êrişeke nû armanc dike û diyar kir dibe ku cihê êrişên nû Garê be.
Onal di dewamî de anî ziman ku Tirkiye dixwaze li ser Başîqa û Mûsilê serweriya xwe bi dest bixin û wiha got:
“Ji bo rewakirina vê yekê bi Îran û Iraqê re hevdîtinan dikin. Iraqê bi avê û çeteyên ku wan ew perwerde kirine tehdîd dike.
Lewma bi rayedarên Iraqê re hevdîtinan dike. Hevdîtin wê di 22’yê Nîsanê de jî dewam bikin.
Civîna Qesra Spî ku bi salan e lobiya wê dikin jî, wê di 9’ê Gulanê de pêk bê.
Li vir wê dagirkirina başûrê Kurdistanê û Bakur û Rojhilatê Sûriyeyê gengeşe bikin.”
Sînan Onal: Gel li dijî tevkariya PDK’ê bi Tirkiyê re ye
Zanyarê Siyasetê Sînan Onal, dawiyê bal kişane li ser têkiliyên PDK’ê yên bi Tirkiyê re jî û ev tişt anî ziman
“Têkiliyên PDK’ê yên bi Tirkiyê re li dijî destûra bingehîn a Iraqê ne.
PDK naxwaze bikeve hilbijartinên ku wê li Herêma Kurdistana bên kirin.
Eger bikevê îhtîmala ku çawa li Tirkiyê gel qerta sor da AKP’ê, ew jî wê qertê bibîne.
Gel li dijî vê tevkariyê ye.”
