Rêveberiya Xweser a Şengalê û Desteya Eşayîrî ya Şengalê ragihandin ku ew hewldanên îlankirina mîrekî nû ya Êzidiyan nas nakin û qebûl nakin.
Hevserokê Desteya Rêvebir a Şengalê Xwedêda Ilyas jî diyar kir, Mala Mîra ji bo hesabên siyasî tê bikaranîn û li ser navê gelê Şengalê ev peyam da:”Civaka Êzidî û Gelê Şengalê kî Mîr îlan bike ew Mîre.”
Piştî fermana 2014’an yek ji xebatên herî esasî ya Rêveberiya Xweser a Şengalê, pêşxistina yekîtî û tifaqa civaka Êzidî ye.
Bi armanca parçekirina civaka Êzidî herî dawî Mîrek nû ya Êzidiyan bûye rojev ku hatiye pîlankirin îro li Bexdayê were îlankirin.
Rêvebriya Xweser a Şengalê û Desteya Eşayîrî ya Şengalê bi daxuyaniyekê li hemberî vê pîlana nû helwesta xwe aşkere kirin û gotin ku ew bi ti awayî kesekî ku ne li Şengalê be weke Mîr nas nakin.
Daxuyanî ji aliyê endamê Desteya Eşayîrî ya Şengalê Mîrza Bekir ve hat xwendin.
Mîrza Bekir: Civaka Êzidî û gelê Şengalê kî Mîr îlan bike ew Mîr e
Mîrza Bekir destnîşankir ku li ser Şengalê pîlanekê nû ya siyasî tê meşandin û got:
“Hin aliyên siyasî dixwazin Mîrek nû weke Mîrê Şengalê îlan bikin, em vê yekê red dikin.
Wê xelkên Şengalê biryar bidin bê wê kî bibe Mîr.
Kesekî ku li Şengalê nemaye, ji Emerîkayê hatiye nayê qebûlkirin.
Em Mîr Salim red dikin, qebûl nakin.”
Xwedêda Ilyas: Mala Mîra ji bo siyaseta xwe bikartînin
Hevserokê Desteya Rêvebir a Şengalê Xwedêda Ilyas jî anî ziman ku hin aliyên siyasî Mala Mîran ji bo xwe bikartînin û got:
“Kesê ku wê bibe Mîr lazime bi qebûla gelê Êzidî be û li ser axa Şengalê be.
Mîrîtiya bi vî şêweyî nayê qebûlkirin.
Salim Xelef çi kar û xebat meşand di 2014’an de û heya roja me ya îro?
Dixwazin van kesan ji bo pîlanên xwe yên siyasî bikar bînin.”
Xwedêda Ilyas di dawiyê de banga xizmeta civaka Êzidî li hemû aliyên siyasî kir û got:
“Eger dixwazin ji bo civaka Êzidî tiştekî bikin, bila gorên me yên komî vekin û wendayiyên me bibînin.
Her kê dixwaze xizmetê bike bila li ser axa Şengalê kar û xebatê xwe bimeşîne.”
