Konseya Rêveber a Kongreya Neteweyî ya Kurdistanê-KNK, Konfederasyona Civakên Kurdistaniyên li Elmanyayê (KON-MED), Komîteya Avakar a Meclisa Ol û Baweriyan û Konfederaliya Rêxistinên Civaka Demokratîk Cejna Çarşema Sor li civaka Êzidî û tevahiya mirovahiyê pîroz kirin.
Konseya Rêveber a Kongreya Neteweyî ya Kurdistanê-KNK û Konfederasyona Civakên Kurdistaniyên li Elmanyayê KON-MED’e bi daxuyaniyan Cejna Çarşema Sor pîroz kirin.
KNK’ê diyar kir ku Cejna Çarşema Sor xwedî wateyek dînî û dîrokî ye û got:
“Em ê bi hemû awayî destekê bidin xelkên Şengalê.
Nûnerên xelkê Şingalê, peymana ku di navbera hukumetên Hewlêr û Bexdayê de li ser Şingalê hatî çêkrin, napejirînin û bertekan nîşan didin.”
KNK’ê anî ziman ku divê rewşa xelkê Şingalê û pirsgirêkên Şingalê, bi awayeke teybet bêne nirxandin û çareserî jê re bêne dîtin û wiha domand:
“Divê îradeya xelkê Şingalê, esas bê girtin.
Ji bo parastina civaka Êzidî, pêwîste gelê me hişyar bin û xwedî li gelê me yê Êzidî derkevin.
Bi azadî û bextewarî pîrozkirina cejnên me jî, bi serketina me ve girêdayî ye.”
KON-MED Cejna bi biryardariya xwedîderketina li Şengalê Çarşema Sor pîroz kir
Her wiha Konfederasyona Civakên Kurdistaniyên li Elmanyayê (KON-MED)bi biryardariya xwedîderketina li Şengalê Cejna Çarşema Sor pîroz kir.
KON-MED’ê diyar kir ku civaka Êzdî bi parastina çand û nirxên xwe yên pîroz, hêz û qewet dide civakê û got:
“Li herderê ku civaka Êzîdî li dijî û taybet jî li Kurdistanê, Çarşema Sor tê pîrozkirin.
Pêwîste em van fersend û rojên dîrokî baş binirxînin û rêxistinbûna xwe bilind bikin û ji bo serkeftinê hemû hêza xwe seferber bikin û ji bo xweseriya Şengalê tekoşinê pêş bixin.”
KON-MED: Şengal koka hemû Kurdan e, em ê xwedî lê derkevin
KON-MED’ê anî ziman ku Şengal hebûna Êzdiyan e û koka hemî Kurdan e û wiha domand:
“Ji ber vê yekê, em ê li hebûna xwe xwedî derkevin.
Em hêvîdarin ku Çarşema Sor, bibe wesîleya aştî, azadî û aramiya mirovahiyê.”
Meclisa Ol û Baweriyan: Çarşema Sor li tevahî mirovahiyê pîroz be
Komîteya Avakar a Meclisa Ol û Baweriyan jî Cejna Çarşema Sor li civaka Êzidî û tevahiya mirovahiyê pîroz kir û got:
“Em hêvî dikin ku gelê me yên êzidî di nava aramî û aştiyê de bijî û baweriya xwe biparêze û xweser bijîn.”
Konfederaliya Rêxistinên Civaka demokratîk Çarşema Sor pîroz kir
Konfederaliya Rêxistinên Civaka Demokratîk jî Çarşema Sor pîroz kir.
Konfederaliyê bang li civata êzidî, sazî û şêxên wê kir ku têkoşînê mezin bikin, ji bo ku binesaziya civakî ya herêmê bi rêya sepandina yekitiyê û biratiyê xurttir bikin.
