Îsraîl qadên xwe yê şer berfireh dike.
Aliyekî hewldana bersivdana Îranê, aliyekî şerê li Xezayê û aliyekî jî li Lubnanê li dijî Hizbullahê êrîşan pêk tîne.
Ev du rojin Îsraîlê bi balafirên bê mirov li dijî bajarokên li başûrê Lubnanê êrîşan pêk tîne.
Di encama wan êrîşan de 2 kes mirin ku li gor îddaya Îsraîlê yek ji wan fermandarekî payebîlînd ê Hizbullahê ye.
Her wiha Hizbullah jî ragihand ku pergala parastina moşekan a Beyt Hillel a bakurê Îsraîlê bi balafirên bê mirov hatiye xistin.
Li başûrê Lubnanê êrîşên artêşa Îsraîlê li dijî Hizbullahê didome.
Artêşa Îsraîlê bajarokê Ayn Bal a li herema Sûr a başûrê Lubnanê wesayîtek kir armanc.
Piştî vê êrîşê dîsa heman heremê li bajarokê Eş-Şehabiyê du wesayît kir armanc û 2 kes mirin.
Li ser êrîşê artêşa Îsraîlê daxuyanî da û got:
“Li Ayn Balê yek ji fermandarên qadê yê Hizbullah hat kuştin.
Ew fermandar li gelek cihan erk girtiye û di asta fermadariya tugayê ye.
Di êrîşê de 2 kes mirin
Ji heremên peravê ya Lubnanê plan dikir li dijî Îsraîlê moşek û roketan bavêje”
Her wiha artêşa Îsraîlê bajarokên Meys el Cebel û Tayr Harfa ya başûrê Lubnanê êrîş pêk anî.
Ajansa Nûçeyan a Netewî ya Lubnanê ragihand ku di êrîşê de hin mal û avahiyan xisarek cidî dîtin lê windahiyên canî çênebûne.
Artêşa Îsraîlê êrîşên hewayî ya li ser başûrê Lubnanê piştrast kir û da zanîn ku li Meys el-Cebel baregeheke leşkerî ya Hizbullah hatiye bombebarankirin.
Her wiha artêşê diyar kir ku hedefa ku li Mezraya Şeba ya başûrê Lubnanê gefê ava dikir bi topavêjan hatiye xistin.
Hizbullah li bakurê Îsraîlê bi balafirên bê mirov êrîş pêk anî
Li aliyê din Hizbullahê jî ragihand ku pergala parastina moşekan a Beyt Hillel a bakurê Îsraîlê bi balafirên bê mirov hatiye xistin.
Her wiha hizbullahê destnîşan kir ku di êrîşê de kesên parastina Qubeya Hesinî dikirin hinek ji wan mirin û birîndar bûn.
Times of Îsraîl jî diyar kir ku li nêzî bajarokê Kiryat Şîmona ya bakurê Îsraîlê di encama êrîşên du balafirên bê mirov 3 kes birîndar bûn.
Times of Îsraîl anî ziman ku yên birîndar bûne birînên wan sivikin û ji bo vê êrîşê alarmekî nehat kirin.
Artêşa Îsraîlê derbarê vê êrîşê de da xuyakirin ku du balafirên bê mirov li herêma Beyt Hillel teqiyaye û bûyerê lêpirsîn dikin.
