Bi hezaran xwendekar di bin êrîş û ambargoyê de perwerdeyê dibînin.
Li Kantona Efrîn-Şehbayê û Helebê ku di bin êrîşên dewleta Tirk û ambargoya hikumeta Şamê de ne 14 hezar û 793 xwendekar perwerdeyê dibînin.
179 xwendekar jî li Enstîtuya Şehîd Viyan Amara dibin pispor.
Li Kantona Efrîn-Şehbayê û Helebê (Eşrefiye-Şêxmeqsûd) li dibistanên seretayî, navîn û lîseyê 14 hezar û 793 xwendekar perwerdeyê dibînin û hezar û 90 mamoste hene.
Li kantonê ku 61 dibistan hene, ji sala 2019’an û vir ve 133 xwendekar ji Enstîtuya Şehîd Viyan Amara mezûn bûn.
Di salên 2023-2024’an de perwede û hîndekariya 179 xwendekaran dewam dike.
Hevserokê Desteya Perwede û Hîndekariyê ya Kantona Efrîn-Şehbayê Fadil Çawîş li ser sîstema perwerdeyê ya li kantonê, asta pêşketinê ya mamoste û xwendekaran û zor û zehmetiyan axivî.
Fadil Çawîş: Ambargo bandorek mezin li Perwerdê kir
Fadil Çawîş anî ziman ku piştî Efrîn hate dagirkirin salekê sîstema perwerde û hîndekariyê nekarî bê rûniştandin û got:
“Di sala 2018’an de dema em hatin Şehbayê hem gelê me hem jî mamoste belawela bûn.
Dagirkerî nû qewimî bû. Pîştî wê ji ambargoya hikûmeta bandorek mezin li perwerdeyê kir.
Ji ber vê yekê me sîstema xwe ya perwerdeyê sala destpêkê nekarîn baş bidin rûniştandin.
Peydakirina malzemeyên xwendin û nivîsandinê gelekî zehmet bû.”
Fadil Çawîş: Sîstema Perwerdeyê ya ji 3 Zimanan
Fadil Çawîş bal kişand ser sîstema perwerde û zimanan ya li Kantona Efrîn-Şehbayê û got:
“Li dibistanên me bi sê zimanan perwerde heye.
Xwendekarekî ku zimanê xwe yê dayikê bi Kurdî ye heta pola 3’yemîn tenê bi zimanê xwe yê dayikê tevlî perwerdeyê dibe.
Dema digihêje pola 4’an dersa zimanê Erebî jî dibîne.
Di pola 5’an de perwerdeya zimanê Îngilîzî jî dibîne.
Şert e ku di pola 5’emîn de zimanê Îngilîzî hîn bibe.
Ji bo dema bê plansaziyeke me heye ku weke dersa hilbijartî guhertinekê bikin.
Em difikirin ku ji tercîha xwendekar re bihêlin.”
Fadil Çawîş: Wê dibistanên nû bêne avakirin
Fadil Çawîş ragihand ku di sala nû ya perwerde û hîndekariyê de wê giranî li ser çareserkirina pêwîstiyên bi dibistanan bê danîn û got:
“Piraniya dibistanên me ji bo perwerdeyê guncaw nîne.
Avahiyên gelek dibistanên me bi xisar in. Ji ber vê yekê jî em neçar man ku hin dibistanên xwe bigirin.
Gelek avahiyên dibistanan ên xisar li wan bûbû hatin tamîrkirin lê belê ji bo perwerdeyeke hîn baş divê rewşeke baş bê avakirin.
Bêguman em ê li gorî derfetên xwe van pêwîstiyan bi cih bînin.
Ji bo hin gundan me 5 mal kirê kirin û weke dibistanê bi kar tînin.
Ji bo van gundên me plana me heye ku dibistanên nû ava bikin.
Ji ber ambargoyê ji niha ve me dest bi amadekirina materyalên perwerdeyê kirine.”
