Alîkariya Ukraynayê ku bi mehan e li Amerîkayê bûye qada pevçûnên siyasî, ji aliyê Kongreyê ve hat qebûlkirin.
Di pakêtê de 61 milyar dolar alîkariya leşkerî ya ji bo Ukraynayê û 26 milyar dolar jî alîkariya leşkerî ya ji bo Îsraîlê heye.
Li aliyê din Yekîtiya Ewropayê li dijî şîrketên Tirkiyê, Çîn, Îmarat û Hong Kongê yên ku alîkariyê didin Rûsyayê, cezayên nû amade dike.
Piştî çend mehan ji gengeşiya siyasî li Kongreya Amerîkayê, proseya qebulkirina pêşnûmeya alîkariya leşkerî ya 61 milyar dolarî bo Ukraynayê bi dawî bû.
Tevahiya pakêta 95 milyar dolarî, ku ji çar qanûnê pêk tê, alîkariya leşkerî ji bo Ukrayna û hem jî Îsraîl, Taywan û li herêma Hind-Pasîfîk dihewîne.
Pakêta alîkariyê piştî ku Serokê Amerîkayê Joe Biden îmze bike dê bikeve meriyetê.
Biden piştî dengdayînê axivî û diyar kir ku ew ê pêşnûmeya qanûnê îmze bikin û di demeke kin de têxin meriyetê.
Zelensky: Alîkariya pejirandî ji bo Ukraynayê girîngiyeke jiyanî ye
Her wiha destnîşan kir ku ew dixwazin vê hefteyê sewqiyata çek û alavan bo Ukraynayê dest pê bikin.
Biden li ser mijarê wiha got:
“Em li gel demokrasî û azadiyê bi biryardarî li dijî zilm û zordariyê radiwestin.
Ev qanûna krîtîk ku bi alîkariya dostên xwe tê derxistin mîletê me û cîhanê hîn bi ewletir bike.”
Di daxuyaniya xwe ya piştî dengdanê de, Serokê Ukraynayê Volodymyr Zelenskiy spasiya Senatoyê kir.
Zelensky destnîşan kir ku alîkariya pejirandî ji bo Ukraynayê girîngiyeke jiyanî ye.
Amerîkayê ji Sibata 2022’yan û vir ve ku Rûsyayê êrîş kir, zêdetirî 44 milyar dolar alîkariya leşkerî pêşkêşî Ukraynayê kir.
Şîrketên Tirkiyê, Îmarat û Çînî alîkariya Rûsyayê dikin
Yekîtiya Ewropayê li dijî şîrketên Tirkiyê, Çîn, Îmarat û Hong Kongê yên ku alîkariyê didin Rûsyayê, cezayên nû amade dike.
Di nûçeya Bloombergê de hat weşandin, tê gotin ku şîrketên ku li Tirkiyê û Îmaratê ne û her wiha Rûsya bi milyonan euro kelûpelên Ewropayê îthal dikin.
Van kelûpelan paşê tevî qedexeyên bazirganiyê yên Yekîtiya Ewropî ji hêla artêşa Rûsyayê ve hatin bikar anîn.
Yekîtiya Ewropayê li dijî şîrketên alîkariya Rûsyayê dikin cezayan amade dike
Yekîtiya Ewropayê ji ber şerê Ûkraynayê 13 pakêtên cezayan pêşkêşî Rûsyayê kir.
Ji bo vê yekê Cîgirê Serokê Komîsyona Yekîtiya Ewropayê Valdis Dombrovskis diyar kir ku Yekîtiya Ewropayê dest bi amadekariyên pakêta 14’emîn a cezayan kiriye, ku divê vê biharê were qebûlkirin.
Rayedarekî payebilind ê Yekîtiya Ewropî herî dawî di civîneke kurt de ragihand ku pakêta nû dê tedbîrên cezakirinê li dijî kesên ku ji cezayên berê yên li dijî Rûsyayê derbas dikin, bigire.
