Bi hezaran Êzidiyên bi destê DAIŞ’ê hatin kuştin, di gorên komî de hatin veşartin.
Civaka Êzidî ji ber xemsariya di mijara gorên komî de nerazîbûnê xwe nîşanî dewleta Iraqê didin.
Nûnerê saziya Petrichorê Xêrî Îbrahîm li ser mijarê axivî û bang li saziyên alaqadar kir û got:”Em bang li saziyên pêwendîdar dikin ku di zûtirîn demê de van gorên komî vekin.”
Piştî fermana 3’ê Tebaxa 2014’an, ji bo civaka Êzidî ya li Şengalê yek ji mijarên herî bi êş jî gorên komî ye.
Bi hezaran Êzidiyên bi destê DAIŞ’ê hatin kuştin, di gorên komî de hatin veşartin.
Em nêzîkî 10’emîn salvegera fermanê dibin lê ji bo Êzidiyan devê vê birînê hê jî vekiriye.
Di nav 10 salan de cihê 92 gorên komî hatine tesbîtkirin lê bi tenê 55 ji van hatine vekirin.
Civaka Êzidî ji ber sersarî û xemsariya di mijara gorên komî de nerazîbûnê nîşanî dewleta Iraqê dide û banga tevgera lezgîn lê dike.
Rêveberiya Xweser a Şengalê û çend saziyên civaka medenî jî ji fermanê heya roja me ya îro ji bo vekirina gorên komî û zelalkirina kesên çarenûsa wan ne diyar kar û xebat dimeşînin.
Yek ji wan saziyan jî Petrichor e ku cihê wan li navenda Şengalê ye û bi taybet li ser melefa gorên komî kar dike.
Nûnerê vê saziyê Xêrî Îbrahîm derbarê gorên komî yên Şengalê de agahiyên girîng ji ANF’ê re parve kir.
Rexne li xemsariya hikumeta Iraqê kir û her wiha da zanîn ku wan derbarê PDK’ê de jî gilî kirine ku ev doz hê jî berdewam e.
Xêrî Îbrahîm: Ji 55 gorên komî cenazeyên 700 kesî hatin derxistin
Nûnerê saziya Petrichorê Xêrî Îbrahîm di destpêka axaftina xwe de da zanîn ku li Şengalê cara yekem di 15’ê Adara 2019’an de li gundê Koçoyê dest bi vekirin û lêkolîna gorên komî hatiye kirin û ev agahî dan:
“Heya niha li Şengalê 92 gorên komî hatine tespîtkirin ku ji wan 55 hatine vekirin.
Ji van gorên komî jî hestiyên derdora 700 kesî hatine derxistin û şandine bo Saziya Tib a Edlî ya Bexdayê.
Ji wan jî heya niha nasnameya 204 kesan hatiye naskirin û merasîm ji wan re hatiye çêkirin.”
Xêrî Îbrahîm: 37 gorên komî 10 Sal in nehatine vekirin
Xêrî Îbrahîm bi bîr xist ji 92 gorên komî ku heya niha cihê wan hatine tesbîtkirin 37 ji wan heya niha nehatine vekirin û wiha berdewam kir:
“Em jî bang li saziyên pêwendîdar dikin di zûtirîn demê de van gorên komî vekin.
Li gel gorên komî ku heya niha nehatine vekirin, gorên komî yên nû jî têne keşifkirin.
Dema rexne li saziyên pêwendîdar tê kirin, ew jî dibêjin hejmara me kêm e û li seranserê Iraqê gelek gorên komî hene.
Hê gorên komî yên ji dema Sedam Hisên mane ku li ser dixebitin.”
