Qirkirina xwezaya Kurdistanê bi destê dijmin dewam dike.
Hevserokê Desteya Ekolojiyê Îbrahîm Esed diyar kir ku dewleta Tirk li dijî Bakur û Rojhilatê Sûriyê bi rêk û pêk qirkirina ekolojîk û civakî dike û got:
“Êrîşên tirkiyê zirareke mezin didin xwezayê.
Rêveberiya Xweser li hemberî van êrîşan bi hemû saziyên xwe her roj li ber xwe dide.
Hevserokê Desteya Ekolojiyê ya Bakur û Rojhilatê Sûriyê Îbrahîm Esed karên li ser ekolojiyê yên li Bakur û Rojhilatê Sûriyê û konferansa ekolojiyê ya meha Nîsanê hate lidarxistin nirxand.
Îbrahîm Esed anî ziman ku bi Şoreşa 19’ê Tîrmehê re li her qada jiyanê şoreş pêk hat û got:
“Şaş e ku mirov Şoreşa 19’ê Tîrmehê tenê weke şoreşeke siyasî binirxîne.
Di hin aliyan de gavên girîng hatin avêtin, lê hin alî jî ji ber êrîşên Tirkiyê lawaz man.
Êrîşên dewleta Tirk bi taybetî dagirkirina Efrîn, Serêkaniyê û Girê Spî zerareke cidî da xwezayê.”
“Konferansa Ekolojiyê di navbera 26-27’ê Nîsanê de hate lidarxistin”
Esed ragihand ku weke Komîteya Ekolojiyê wan hin plansazî danîn pêşiya xwe û wiha domand:
“Xebatên me yên ji bo avakirina Meclîsa Ekolojiyê dewam dikin.
Yek ji karên ku me danîn pêşiya xwe jî lidarxistina Konferansa Ekolojiyê bû.
Di navbera 26-27’ê Nîsanê de hate lidarxistin, ji welatên cuda gelek aktîvîstên ekolojiyê û akademîsyen tevlî bûn.
Di konferansê de karên heyî û karên bêne kirin hatin nirxandin û gihîşt armanca xwe.”
“Dewleta Tirk û hikumeta Şamê her roj êrîşan dibin ser modela Rêveberiya Xweser”
Hevserokê Desteya Ekolojiyê Îbrahîm Esed anî ziman ku dewleta Tirk a dagirker bi rêk û pêk qirkirina ekolojîk û civakî li Bakur û Rojhilatê Sûriyê dike û got:
“Hem dewleta Tirk hem jî hikumeta Şamê her roj êrîşan dibin ser modela Rêveberiya Xweser.
Rêveberiya Xweser li hemberî van êrîşan bi hemû saziyên xwe her roj li ber xwe dide.
Li aliyê din li hemberî rîska ku gaza siyanurê tevlî Çemê Firatê bûye, ku piştî teqîna li Tirkiyê ev rîsk mezin bû, em rojane testan û analîzan dikin.
Biryareke din jî ew e ku bi pêşengiya Meclîsa Ekolojiyê her sal di asta cîhanê de konferanseke ekolojiyê bê lidarxistin.”
“Ji bo avakirina aliye hiqûqî yê Ekolojiyê pêşnûmeyek radestî Saziyên hiqûqê hate kirin”
Îbrahîm Esed di dawiyê de diyar kir ku ji bo avakirina aliye hiqûqî yê ekolojiyê pêşnûmeyek radestî saziyên hiqûqê
hate kirin.
