Hizbullah hemwextî bombebaranên Îsraîlê ya li dijî Refahê û hin heremên Şerîda Xezayê êrîşên xwe li başûrê Lubnanê zêde kir.
Di êrîşên çend rojan de bi balafirên bê mirov armancên Îsraîlê hat xistin û di van êrîşan de jî leşkerek Îsraîlê hat kuştin.
Li aliyê din jî Wezîrê Parastinê Îsraîlê gef li Lubnanê xwar û diyar kir ku dê havînê bersivek tund bidin Hizbullahê.
Hizbullah li başûrê Lubnanê êrîşên xwe li dijî Îsraîlê zêde kiriye.
Sedema êrîşan jî weke bersivdana bombebaranên Îsraîlê ya li dijî Refah û Xezayê tê diyarkirin.
Berxwedana Îslamî di daxuyaniyên cuda de diyar kir ku çekdarên wan bi balafirên bê mirov êrîşeke hewayî leşkerên Îsraîlê kirine armanc.
Nêzî saetek û nîv piştî êrîşa balafirên bêmirov ên li ser baregeha Ramot Naftalî, Hizbullahê ragihand ku ‘bi moşekên rênîşander baregeha Zabdîn a li zeviyên Şebaa kiriye armanc’.
Di daxuyaniyeke din de, Hizbullahê ragihand ku wan li herêma el-Sammaka li girên Kefer Şûba, alavên sîxuriyê kirine armanc û got:
“Piştî şopandina li herêma El-Rehab, leşkerên dijmin ên ku di hundirê stargehekê de diçûn, bi moşekan hatin armanckirin.”
Îsraîl ‘bi havîneke germ’ Lubnanê tehdît dike
Her wiha Îsraîlê duh bi ‘havîneke germ’ gef li Lubnanê xwar.
Wezîrê Parastinê yê Îsraîlê Yoav Gallant serdana li baregeheke leşkerî ya li ser sînorê Lubnanê kir.
Yoav Gallant diyar kir ku Artêşa Îsraîl Hizbullahê ji xetên pevçûna nêz dûr xistiye û got:
“Pergalên me yên ku bersivekî xurt bide hene.
Hûn dikarin pê ewle bin ku ger hewce be em ê wan çalak bikin. Dibe ku ev havîn germ be.”
Di êrîşa Îsraîlê de leşkerekî Îsraîlê mir
Li aliyê din li gorî rojnameya Times of Israel, artêşê îro ragihand ku di encama êrişa Hizbullahê de li nêzîkî herêma Malkiyê li başûrê Lubnanê, leşkerek hatiye kuştin.
Tugaya Quds ku baskê leşkerî yê koma Cîhada Îslamî ye duh ragihandibû ku di encama bombebarana Îsraîlê ya li ser başûrê Lubnanê de 3 endamên wê hatine kuştin.
Çavkaniyekî ewlehiyê ji ajansa nûçeyan a Fransî AFP re axivî û diyar kir ku 5 kes di bombebarana Îsraîlê de li başûrê Lubnanê hatin kuştin.
