Welatên Yekîtiya Ewropayê ji bo piştgiriya leşkerî ya ji bo Ukraynayê dahateyên samanên rûsî yên cemidkirî bikar bînin.
Komek piçûk a dewletên endam, di serî de Macaristan û Avusturya, dayîna çekan ji Ukraynayê re red dikin.
Li aliyê din Wezareta Parastinê ya Rûsyayê ragihand ku li “Herêma Leşkerî ya Başûr” tetbîqata bikaranîna çekên nukleerî dest pê kir.
Welatên Yekîtiya Ewropayê ji bo piştgiriya leşkerî ya Ukraynayê dahateyên samanên rûsî yên cemidkirî bikar bînin.
Yekîtiya Ewropî ya ji 27 welatan pêk tê, nêzîkî 210 mîlyar euro ji sermayeyên banka navendî ya Rûsyayê digire, ku piraniya wan li Belçîkayê hatine cemidandin.
Tê texmînkirin ku faîza li ser vî pereyî dikare her sal bi qasî 3 mîlyar euroyî çêbike.
Yekîtiya Ewropayê diyar kir ku ji sedî 90 ê pereyan dê ji bo fona taybet a bi navê Tesîsa Aştiyê ya Ewropî were veguheztin, ku gelek welatên Yekîtiya Ewropî ji bo diravdana çek û cebilxaneyên ku şandine Ukraynayê bikar tînin.
Ji sedî 10’ê din jî dê derbasî butçeya Yekîtiya Ewropayê bê kirin.
Ger hin welat li dijî wê yekê ne ku para wan ji bo mebestên leşkerî were bikar anîn, dê bernameyên ku bi van pereyan têne fînanse kirin ji bo bihêzkirin an ji nû ve avakirina pîşesaziya parastina ya Ukraynayê were hesibandin.
Macaristan û Avusturya dayîna çekan bo Ukraynayê red dikin
Her wiha komek piçûk a dewletên endam, di serî de Macaristan û Avusturya, dayîna çekan ji Ukraynayê re red dikin.
Rayedaran dibêjin beşa yekem a dirav dikare di Tîrmehê de were peyda kirin.
Serokê Ukraynayê Vladimir Zelenskiy di gelek konferansên navneteweyî de daxwaz kiribû ku pereyên Rûsyayê yên ku di bankên cîhanê de hatine cemidandin, ji bo avakirina welatê wî ji Kîevê re bên şandin.
Ukrayna bêhêvî ye ku çek û cebilxane bi dest bixe ji ber ku Rûsya avantajên xwe yên leşkerî pêş dixe.
Rûsya tetbîqata çekên nukleerî destpê kir
Li aliyê din Wezareta Parastinê ya Rûsyayê ragihand ku li “Herêma Leşkerî ya Başûr” tetbîqata bikaranîna çekên nukleerî dest pê kir.
Di daxuyaniya Wezaretê de hat diyarkirin ku “Bi talîmata Pûtîn û di bin serokatiya Serfermandariya Giştî de qonaxa ewil a tetbîqata li ser amadekirin û bikaranîna çekên nukleerî yên ne-stratejîk dest pê kir.
Di daxuyaniyê de hat ragihandin ku di çarçoveya tetbîqatê de yekîneyên leşkerî yên li herêmê cebilxaneyên pêwîst ên sîstema moşekî ya taktîkî ya “Îskender” gihandine nuqteya ku hatiye diyarkirin û dê ji bo bikaranînê amade bin.
Di daxuyaniyê de hat ragihandin ku dê balafirên bi moşekên “Kinjal” ên hîpersonîk jî tevlî tetbîqatê bibin.
Hat destnîşankirin ku tetbîqat ji bo zêdekirina kapasîteya amadebûna hêzên nukleerî yên Rûsyayê û parastina yekparçeyiya axê hat lidarxistin.
Amerîka: Heta Rûsya leşkerên xwe venekişîne em ê çekan bidin Ukraynayê
