Hevseroka Meclisa Gel ya bajarokê Hecînê Ayde El-Colan diyar kir ku ji ber jin di her qadê de asta rêveberiyê de cîh digirin roleke gelekî girîng di avakirina civakê de dilîzin.
Piştî rizgarkirina Dêre Zorê ji destê çeteyên DAIŞ’ê rola û rewşa jinan di nav civakê de hat guhertin.
Jinên Dêre Zorê piştî rizgarbûna ji tarîtiya çeteyên DAIŞ’ê, di nav sazî û meclisên xwecihî de cih girtin û di asta hevserokatiyê de jî bûn xwedî biryar.
Tevî hemû zehmetiyên ku hîn xwe didin der jî jian beşek mezin ji avakirina civakê girtine ser milê xwe.
Ayde El-Colan: Rola jinan guhertinên mezin bi xwe re anîn
Hevseroka Meclisa Gel ya bajarokê Hecînê Ayde El-Colan derbarê rol û mîsyona jinan di nava sazî û meclisan de wiha anî ziman:
“Rola jinan veguhertinên mezin bi xwe re anîn.
Jinan fikra hevserokatî bi coşeke mezin pêşwazî kirin ji ber weke xala veguhertinê di qada siyasî û rêveberî de bû.
Nerîna derbarê jinan de jî bi avabûn û hebûna Rêveberiya Xweser hat guhertin.
Baweriya jinan bi wan gelekî zêde bû û bû sedem ku rola wan di saziyan de gelekî xurt bibe.”
Ayde El-Colanî diyar kir ku jinên Dêra Zorê di tevahî qadan de hebûna xwe nîşan dan û wiha dewam kir:
“Piştgiriya ku jinan ji gelek aliyên rêveberî wergirt bandoreke mezin li pêşxistina wê di kar de kir.
Îro roj mirov dikare bêje jinan hebûna xwe îsbat kirine.
Tişta niha hatiye bidestxistin destpêkirineke xurt ji jinan re ber bi pêşerojê ye.”
Ayde El-Colan: Jin bingeha serkeftin ê ne
Ayde El-Colanî destnîşan kir ku serkeftinên ku îro têne bidestxistin bi destê jinane ji ber ku bi rengekî sereke ev sazî xwe dispêrin rola jinan û wiha gotinê xwe bi dawî kir:
“Divê nerîna pêşerojê hîn berfirehtir û mezintir be.
Divê em bawernameyên zanistî qezenc bikin û piştgiriyê bidin jinên bêkar.
Ez ji hemû jinên Bakur û Rojhilatê Sûriyê re hêvî dikim ku di riya xwe de serkeftî bin û hîn zêdetir xwe pêş bixin.”
