Artêşa Ukraynayê êrîşên xwe yên li hemberî herêma Kursk a Rûsyayê roja Înê jî dewam kir.
Li Lîpetks ê bi qasî 300 kîlometre dûrî sînorê Ukraynayê ye, bi şev agir bi baregeheke leşkerî ket.
Li aliyê din Wezareta Parastinê ya Amerîkayê anî ziman ku êrîşên artêşa Ukraynayê li ser herêma Kurskê ya Rûsyayê rageşiya li herêmê zêde nake.
Rûsya, roja Pêncşemê bi daxuyaniyekê ragihand ku li herêma Kurskê ya li ser sînora Ukranyayê pevçûn berdewam dike.
Li gorî Moskowayê, nêzî hezar leşkerê Ukranyayê sînor derbas kirine.
Rayedaran, li herêmê rewşa awarte ragihandin.
Êrîşa li dijî herêma Kurskê, ji bo Rûsyayê weke derbeyek ku ne li bendê bû hat nirxandin.
Serfermandariya Giştî ya Rûsyayê, ragihand ku ji bo leşkerên Ukraynayê ji Rûsyayê derxînin bi hemû hêza xwe kar dikin.
Her wiha Wezareta Parastinê ya Rûsyayê jî got:
“Operasyona ji bo têkbirina yekîneyên artêşa Ukranyayê didome.”
Li gorî texmîna Enstîtuya Lêkolîna Şer a (ISW) ku navenda wê li Amerîkayê ye di rapora xwe ya dawî de diyar kir ku Ûkraynî heta kûrahiya 10 kîlometreyan bi pêş ve çûne û “herî kêm du xetên parastinê yên Rûsyayê” derbas kirin.
Hin çavkanî jî tînin ziman ku bi dehan kîlometreyî ketine herêmê.
Li Belgorod û Kirim’ê êrîşên bi dronan
Tevahiya şevê, bi taybetî bi dronan êrîş dewam kirin.
Waliyê Belgorodê Vyaçeslav Gladkov li ser Telegramê nivîsand ku parastina hewayî ya Rûsyayê li herêma îdarî ya Belgorod a li ser sînorê Ukraynayê 29 balafirên keşfê xistine xwarê û di encama vê de zerara madî çêbûne lê kes birîndar nebûye.
Walî Mîkaîl Razvojaev, jî bêyî ku hûrgiliyên zêdetir bide diyar kir ku li Sevastopol a li nîv girava Kirimê êrîşên bi balafirên bê mirov, pêk hatine.
Li Lîpetskê ku 300 km li hundir e teqîn çêbûn
Şeva Pêncşemê li herêma Lîpetskê ku dûrî sînorê Rûsya û Ukranyayê ye, bi balafirek bê mirov a mezin êrîş pêk hat.
Waliyê Lîpetskê Igor Artamonov, ragihand ku di encama êrîşa bi balafirê bêmirov a ku ji aliyê Ukraniyayê ve hatiye kirin de santralek elektirîkê zerar dîtiye.
Walî piştî vê êrîşa mezin rewşa awarte ragihand.
Waliyê herêma LîpetskêI Îgor Artamonov sibeha Înê bi daxuyaniyekê got:
“Niha 9 kes di lîsteya qurbaniyan de cih digirin.”
Pentagon: Êrîşa Ukraynayê ya li Kurskê aloziyê li herêmê zêde nake
Li aliyê din Wezareta Parastinê ya Amerîkayê (Pentagon) anî ziman ku êrîşên artêşa Ukraynayê li ser herêma Kurskê ya Rûsyayê rageşiya li herêmê zêde nake.
Cîgira Berdevka Wezaretê Sabrina Singh di civîna çapemeniyê de bersiv da pirsên rojnamevanan.
Singh, anî ziman ku Ukraynayê “ji bo xwe biparêze” li Kurskê çalakî pêk aniye.
Singh destnîşan kir ku Amerîka destekê nade êrîşên dûr û dirêj û da zanîn ku êrîşên Ukraynayê yên li Kurskê zêdetir wek hev in û ev yek ne li dijî polîtîkayên Amerîkayê ye.
