Birîndarên komkujiya gundê Dehlê li nexweşxaneya Leşkerî a Dêra Zorê tên dermankirin.
QSD ji bo dermankirina birîndaran ketiya nava tevgerê û erka xwe ya mirovî pêk tîne.
Ji bo naskirina rewşa birîndaran, îro şandeyek ji nûner û rûspiyên Eşîra Igêdat çûn nexweşxaneyê û serdana welatiyên birîndar kirin.
Li gorî agahiyên bijîşkan, rewşa 3 birîndaran giran e.
Di êrişa li ser gundê Dehla de ji heman malbatê 4 kes şehîd bibûn, 2 zarok, dapîr û meta wan jî bi giranî birîndar bibûn.
Birîndar li nexweşxaneya leşkerî ya Dêrazorê tên dermankirin.
Îro şandeyek ji rûspiyên eşîreya Igêdat serdana birîndaran kir.
Nûnerê eşîra Igêdat ê Herêma Cizîrê Şêx Hisên El- Ebrez tevî şandeyê li nexweşxaneyê rewşa birîndaran pirsî.
Îsmaîl Ebûd El-Hisên: Divê hesab ji kesên ku komkujî pêk anîne bê xwestin
Îsmaîl El-Hisên ku tevahî malbata wî di topbarana dijwar de şehîd bûbûn, bi dilek giran komkujiya Dehla şermezar kir.
“Di van êrîşên hovane de hevjîna min, 2 zarokên min û xwarzêya min hatin kuştin.
Her wiha xwûşk, dayîk û 2 zarokên min jî bi giranî birîndar bûne.
Divê kesên ku ev komkujî pêk anîne hesab ji wan bê xwestin.
Ez spasiya Hêzên ‘QSD’ê dikim ku bi hawara malbata min ve çû û zarok, dayîk û mirovên me derman dikin.”
Nûnerên Igêdat: Em ê li gel hêza xwe QSD’ê hemû êrişan têk bibin
Nûnerê eşîra Igêdat a herêma Cizîrê Şêx Hisên El-Ebrez anî ziman ku komkijiya Dehla ji derveyî pîvanên mirovî û exlaqî ye.
“Welatî di malê xwe de razayî bûn û ji nişkave bi awayekî hovane hatin hedef girtin.
Divê sucên li dijî gelê herêmê tên kirin bê hesab nemînin.
Em weke rûspiyên eşîra Igêdat hemû li gel şervanên xwe yên QSD’ê ne.
Emê bi hêza QSD’ê û bi îradeya gelên herêmê hemû êrîşên ku aramiya herêmê dikin armanc, têk bibin.”
Bijîşkê bi navê Mihemed Xelef derbarê rewşa birîndaran agahî parve kir û wiha anî ser ziman:
“Zarokê 12 salî yê bi navê Fehid ji mejiyê xwe de derb xwariye û hinek perçe di laşê wî de hene, niha rewşa wî di bin kontrolê de ye.
Zaroka 5 salî ya bi navê Melek rewşa wê gelekî giran e.
Melek hem di mejiyê xwe de, hem jî di cîger û qirika xwe de perçe xwariye.
Jina bi navê Sûriya El-Ebûd a 50 salî jî di zikê xwe de bi giranî bîrindar bûye.
Keça ciwan jî a bi navê Melek Ebûd Hisên di bi awayekî giran di sînga xwe de birîndar bûye.
Dr.Mihemed Xelef dawiyê diyarkir wek nexweşxaneya leşkerî, ewê hemû derfetên xwe bikar bînin da ku birîndaran derman bikin.
Em li mala xwe bûn, di seat 2:30 an de li mala cîranê me xistin.
Bû seat 6’ê siharê me taştiya xwe dixwar û li me dan, 4 kes ji malbata me mirin û em 4 jî birîndar bûne.
Perçe di sînga min dene, ji ber wê zehmetiyê di nefesê de dikşînim.
