Alozî û rageşiya di navbera Îsraîl û Îranê de didome.
Piştê armanckirina Îsmaîl Heniya û fermandarê Hizbullahê Îran û alîgirên wê soza tolhildanê dabûn.
Waşîngtonê li ser êrîşên muxtemel a Îranê anî ziman ku dibe vê hefteyê de bersivek ji hêla Îranê re were dayîn.
Berdevkê Konseya Ewlekariya Netewî ya Amerîkayê John Kirby duh ragihandibû ku Amerîka ji bo rêze êrîşên girîng amade ye ku vê hefteyê ji Îranê yan jî komên ku Îranê li Rojhilata Navîn piştgiriya wan dike, bên ser Îsraîlê.
Kirby di daxuyaniya xwe ya ji bo rojnamevanan de diyar kir ku di van çend rojên dawî de Amerîkayê hebûna xwe ya leşkerî li herêmê zêde kiriye.
Li gor daxuyaniya Koşka Spî, Serokê Amerîkayê Joe Biden duh bi serokên hikûmetên Îngilîstan, Fransa, Almanya û Îtalyayê re li ser kêşeyên li Rojhilata Navîn û di nav wan de gefên Îranê yên ji bo êrîşa li dijî Îsraîlê axivî.
John Kirby anî ziman ku Washington tevlî nirxandinên Îsraîlê dibe û çaverê ye ku êrîşeke tolhildanê “dibe ku vê hefteyê were kirin.”
Ji aliyê din ve Berdevkê Artêşa Îsraîlê Danîel Hegarî ragihand ku Tel-avîv geşedanên derbarê gefa êrişa Îranê de dişopîne lê artêşê rêgezên xwe yên tedbîrê li hember welatiyan neguherandiye.
Welatên Ewropî ji Îranê re: Bersiv nedin Îsraîlê
Berdevkê Wezareta Karên Derve ya Îranê Nasir Kenanî li ser daxuyaniya hevpar a Îngilîstan, Almanya û Fransayê ya ku tê de xwestin Îran bersivê nede nirxandin kir
Kenanî bal kişand ser êrîşên Îsraîlê li Xezeyê pêk tîne û wiha got:
“Îran bi biryar e ku ewlehiya xwe ya neteweyî biparêze.
Di heman demê de divê welatên rojavayî bi taybetî Almanya, Fransa û Îngilîstanê ji bo rawestandina sûcên şer û qirkirinên Îsraîlê yên li hemberî gelê Filîstinê bi awayekî bi bandor hewl bidin.”
Kenanî da zanîn ku her sê welatên navborî bang li Îranê dikin ku dev ji mafên xwe yên naskirî berde û got:
“Nêzîkatiyên bi vî rengî wêrekiyê dide Îsraîlê ku li heremê sûcên xwe bidomîne.”
Îranê bertek nîşanî helwestên welatên Ewropî da
Her wiha Kenanî got:
“Eger welatên navborî bi rastî li aştî û aramiyê li herêmê digerin, divê bi tundî li dijî êrîşkariya rejîma nijadperest a Îsraîlê bisekinin.”
Di daxuyaniya hevpar a nivîskî ya ku duh ji aliyê Îngilîstan, Fransa, Almanya, Amerîka û Îtalyayê ve hat dayîn de, hat diyarkirin ku dê hemû piştgirî ji bo parastina Îsraîlê ya li dijî Îranê bidome û wiha hat gotin:
“Em bang li Îranê dikin ku dawî li gefên êrîşa leşkerî ya li dijî Îsraîlê bîne.”
Di daxuyaniyê de hat destnîşankirin ku êrîşeke bi vî rengî dê encamên giran li ser ewlehiya herêmê bike.
