Ji ber ku artêşa Tirk a dagirker bajarê Girê Spî û gundewarên wê dagir kirine, cotkar nikarin çandiniyê bikin.
Cotkarên koçber dibêjin ku ji ber derfet nîne ku çandiniye bikin, nikarin debara malbata xwe bikin.
Endamê Komîteya Çandiniyê ya kantona Girê Spî Ehmed Umer destnîşan kir ku ji ber dewleta Tirk erdên çandiniyê dagir kirine, ev wê li ser aboriya herêmê bandoreke mezin bike.
Li Bakûr û Rojhilatê Sûriyê çandînî, debara sereke ya şêniyên herêmê ye.
Lê ji ber êrîşên dewleta Tirk a dagirker bi hezaran cotkar ji cih û warên xwe koçber bûn.
Dewleta Tirk a dagirker ev erdên dewlemend yên çandiniyê dagir kir û şêniyên herêmê ji debara serekê qut kir.
Li gorî daneyên Desteya Aborî û Çandiniyê, nêzî 250 hezar hektar zeviyên çandiniyê yên Girê Spî hene û ji sedî 70 şêniyên herêmê debara xwe bi çandiniyê dikir.
Endamê Komîteya Çandiniyê ya kantona Girê Spî Ehmed Umer anî ziman ku kantona Girê Spî yek ji herêmên herî dewlemend yên çandiniyê ye.
Umer bibîrxist ku berhemên vê herêmê û genim ji bo bicîhanîna pêdiviyên herêmê rolekî mezin dilîst û got, “Ji ber dagirkeriya dewleta Tirk ev zevî bor mane, ev ê ziyaneke mezin bide aboriya herêmê.”
Cotkarê bi navê Xelîl Mihemed ku ji gundê Tibê yê kantona Girê Spî koçber bûye jî diyar kir ku herêma wan berhemdar e, lê belê ji ber êrîşên dewleta Tirk ew ê ji niha û pê ve nikaribin tu tiştî biçînin û debara malbata xwe bikin.
Silêman Dawûd ê ji gundê Qurnifil ê kantona Girê Spî jî diyar kir ku wî debara xwe bi çandiniyê peyda dikir, lê niha kar nake û nikare qûta malbata xwe peyda bike.
Silêman Dawûd bang li civaka navneteweyî kir ku ji bo dagirkeriya xwe li ser herêmên wan bi dawî bike zextê li Tirkiyê bikin.
