Rêveberên saziyên Meclisa Bajarê Girê Spî li gorî koman pirtûkên Rêber Apo dixwînin.
Rêveberên saziyan diyar kirin ku bi saya xwendina parêznameyên Rêber Apo hişmendiya wan pêş ketiye û pirsigrêkên îdarî çareser dikin û gotin:
“Ramanên Rêber Apo ji tevahî pirsgirêkan re kilîta çareseriyê ye.
Divê her kes van ramanan nas bike û li ser erdê pêk bîne.”
Îro roj li seranserî cîhanê pirtûkên Rêber Apo tên xwendin.
Rêveberên saziyên Meclisa Bajarê Girê Spî li gorî koman pirtûkên Rêber Apo dixwînin.
Derbarê vê mijarê de Rêveberên saziyên Meclisa Bajarê Girê Spî ji ajansa ANHA re axivîn.
Endamê rêveber ê meclisê Îsa Mihemed Mehmûd anî ziman ku gelek sûd ji xwendina van pirtûkan wergirtine û navaroka wê li ser erdê pratîk dikin û got:
“Em niha pirtûka çaremîn a “Manîfestoya Şaristaniya Demokratîk” a bi navê “Li Rojhilata Navîn Krîza Şaristaniyê û Çareseriya Şaristaniya Demokratîk” dixwînin.
Pirtûk mijarên wekî avabûna mirovahiyê, alozî, şer û encamên wê, derketina desthilatê, ezeztî, kareset û kaosên cîhanî ku pergala kapîtalîst derxistine, şîrove dike.”
“Ramanên Rêber Apo dermanê her pirsgirêkekê ye”
Îsa Mihemed Mehmûd diyar kir ku endamên saziyan nûnerên gelên xwe ne û rêgeza demokratîk a ku Rêber Apo daniye, temsîl dikin û wiha domand:
“Rêber Apo ji bo ku em derbasî pergala demokratîk a pirreng û hevbeş bibin, rêgez û pîvan danîne.
Ev rêgez, tevahî cureyên desthilatdariyê ji holê radikin.
Ramanên Rêber Apo dermanê her pirsgirêkeke rêveberî ye.”
Endama rêveber a Komîteya Tenduristiyê ya Meclisa Bajarê Eyn Îsayê Xense Mihemed jî destnîşan kir ku ew her bendeke ji pirtûkê nîqaş dikin û got:
“Em nêrînên xwe bi hev re parve dikin da ku baş fêm bikin û bixin meriyetê.
Di heman demê de da ku fikrên şaş ên ku civakan wêran dikin ji holê rakin.”
“Divê her kes ramanên Rêber Apo nas bike û li ser erdê pêk bîne”
Xense Mihemed anî ziman ku ramanên Rêber Apo ji tevahî pirsgirêkan re kilîta çareseriyê ne û wiha pê de çû:
“Divê her kes van ramanan nas bike û li ser erdê pêk bîne.
Bi rêya van pirtûkan, em desthilatdarî, ezeztî û bîrokratiya ku pergalên berê di nava saziyên rêveberî û xizmetguzarî de afirandine çareser dikin.”
Koma xwendinê ya jinan a Şêxmeqsûdê pirtûkên Rêber Apo nîqaş dike
