Gerîlayên azadiya Kurdistanê li Zapê dronek û kamerayek mobesse yên artêşa Tirk a dagirker bêkêr kirin.
Her wiha li geleke qadan tevgera dagirkeran hate rawestandin.
Dagirkerên ku nikaribûn li hember berxwedana gerîla bi pêş ve biçin, 72 caran qadên gerîla bombebaran kirin.
Navenda Ragihandin û Çapemeniyê ya HPG’ê têkîldarî çalakiyên gerîla û êrişên artêşa Tirk a dagirker daxuyaniyek da.
HPG’ê têkîldarî çalakiyên gerîla ev tişt got:
“Li Herêma Şehîd Delîl a Rojavayê Zapê,
27’ê Îlonê li Qada Berxwedanê ya Girê Cûdî droneyeke dagirkeran bi çekên ferdî û kamerayeke mobesse jî bi sekvaniyê hatin bêkêrkirin.
Roja piştî wê jî li Qada Berxwedanê ya Girê Baharê bi çekên nîv-otomatîk li dagirkeran hate xistin.
Piştî destwerdana hêzên me liv û tevgera dagirkeran hate rawestandin.”
Li Herêma Metînayê jî 27’ê Îlonê dema ku helîkopterên êrîşê Qadên Berxwedanê yên Dergelê, Beşîlî û Serê Metînayê bombe kir rastî bersivdana gerîla hat.
Piştî destwerdana hêzên gerîla helîkopterên êrîşê neçar man ji qadê biçin.
Dagirkeran qadên gerîla 72 caran bombebaran kirin
HPG’ê têkîldarî êrîşên artêşa Tirk a dagirker jî ev agahî parve kirin:
“27’ê Îlonê li Herêma Şehîd Delîl a Rojavayê Zapê tunelên girê FM’ê û girê Cûdî 4 caran bi teqemeniyên qedexekirî hatin bombekirin.
Di nava 3 rojên dawî de jî herêma Qendîlê, Xakurkê, Garê, Metîna û herêma Şehîd Delîl a Rojavayê Zapê 32 caran bi balafirên şer hatin bombekirin.
Her wiha herêma Metîna û herêma Şehîd Delîl a Rojavayê Zapê 36 caran rastî bombebaran helîkopterên êrîşê hatin.
