Endama Desteya Serokatiyê ya Partiya Yekitiya Demokratîk Foza Yûsif destnîşan kir ku dewleta Tirk bi “hincetên derew” êrişî herêma Bakur û Rojhilatê Sûriyeyê dike û got: “Eger Tirkiye dest siyaseta xwe ya înkar û îmhayê bernede, nikare guhertinan pêk bîne.”
Endama Desteya Serokatiyê ya Partiya Yekitiya Demokratîk (PYD) Foza Yûsif têkildarî êrişên dewleta Tirk a dagirker ên li ser herêma Bakur û Rojhilatê axivî.
Foza Yûsif: Bi hincetên derew dixwaze êrişan rewa bike
Foza Yûsif destnîşan kir ku tu têkiliya çalakiya li Tirkiyeyê bi Rêveberiya Xweser re tune ye ku dewleta Tirk ve wek hinceta êrişan nîşan dide û got:
“Dewleta Tirk bi hincetên derew dixwaze êrişên xwe yên hovane rewa bike.
Têkiliya bi bûyerên li Tirkiyeyê bi Rêveberiya Xweser a Bakur û Rojhilatê Sûriyê re tune ye.
Her çalakiyek li wir çêdibe dewleta Tirk êrişî Bakur û Rojhilatê Sûriyeyê dike.
Bi vê dixwaze ji hêzên tundraw re bingehekê ava bike û ji bo têkbirina Rêveberiya Xweser û dagirkirina herêmê wan çalak bike.”
Foza Yûsif: Taktîkê diguherîne lê armanc ne guhertin e
Foza Yûsif bal kişand ser siyaseta dewleta Tirk û anî ziman ku dewleta Tirk li ser Kurdan taktîkan diguherîne lê armanca wê didome û wiha anî ziman:
“Hikumeta Tirkiyeyê di encama dualîtiya ku ji ber siyaseta xwe ya têkçûyî yê de ye, di nava tevliheviyekê de ye.
Eger dest ji siyaseta xwe ya înkar û îmhayê bernede, nikare guhertinan pêk bîne.”
Foza Yûsif: Ger dixwazin pirsgirêkê çareser bikin divê mafên Kurdan nas bikin
“Ger Tirkiye bixwaze pirsgirêkên xwe çareser bike divê mafên gelê Kurd û herêmê binasê.” Bi van gotinan Foza Yûsif wiha îşaret bi rêya çareseriyê kir û got:
“Ev sed sal e li dijî hebûna gelê Kurd şer dike, ji bo serkeftinê her tişt bi kar aniye û firotiye, lê divê bizane ku nikare vîna gelê Kurd û gelan ji holê rake.
Eger Tirkiye bixwaze pirsgirêkên xwe çareser bike, pêwîstî bi naskirina mafên gelê Kurd û mafên gelên herêmê heye.
Tişta ku kir tenê bû sedema dûrbûn û nefreta gelan, lewra ne mimkûn e ku di van siyasetan de bi ser bikeve.”
Foza Yûsif diyar kir ku dewleta Tirk di hundir û derve de têk çûye û got:
“Li dijî vê têkçûnê çi dibe bila bibe divê em yekitiya refên xwe xurttir bikin.
Bi hevgirtî ax û rûmeta xwe biparêzin. Her êrişek li ser herêmekê êrişeke li dijî siberoja me ye.”
Foza Yûsif: Êrîşên li ser herêmê ji bêdengiya Koalîsyona Navneteweyî pêk tê
Di berdewama axaftina xwe de Foza Yûsif bêdengiya Koalîsyona Navneteweyî û Rûsyayê jî nirxand û destnîşan kir ku ev bêdengî ji êrişan re bingehê ava dike û wiha bi dawî kir:
“Vekirina qada hewayî ji dewleta Tirk bi destûr û qebûlkirina van hêzan pêk tê, bang li wan dikin ku dawî li van polîtîkayên dualîtî û neheq ên li ser me bînin.”
