“Qeyûmê diz e, AKP diz e” û “Jin, jiyan, azadî”,
Bi van dirûşmeyan gelê bakur kurdistanê di nava çalakiyan de ne.
Ne bi roj û ne bi şev nasekinin û dijî tayînkirina qeyûmên ser şaredariyan li qadane.
Welatiyan ku dijî qeyûnan derdikevin vê peyamê didin: “Heke em îro dengê xwe nekin, sibe êdî dê dereng be”. Ji bo wê em her kesî vedixwînin berxwedanê.
Roj li derdora şaredariyê, bi şev jî hema hema li tevahiya taxan, gelê Bakurê Kurdistanê xwedî li vîna xwe derdikeve,
Bi vê biryardariyê berxwedana gel ya li dijî tayînkirina qeyûman li ser şarederiyên Mêrdîn Êlih û Xelfetiyê 5 roj in didome.
Xelkê Êlihê tevî hemû cûre êrişan îro jî berxwedana xwe domandin
Xelkê Êlihê ku hevşaredarên xwe bi rêjeyeke ji sedî 64 hilbijartin, tevî hemû cûre êrişan îro jî li pêşiya şaredariya xwe civiyan.
Hevşaredarên bajêr Gulistan Sonuk û Yeşîl Işik tevlî çalakiya li pêşiya şaredariyê bûn û berxwedan li tevahiya bajar belav bû.
Bi hezaran êlihiyan bi dirûşmên “Qeyûmê diz e, AKP diz e” û “Jin, jiyan, azadî” bertek nîşan dan.
Polîsan jî bi gaza îsotê, fîşekên plastîk û bi ava şid êrişî berxwedêran kir.
Di encama êrişan de 60 kes bi lêdanê hatin binçavkirin.
Welatiyan, li dijî êriş û zextan paşve-gav neavêt û her ku çû berxwedana xwe mezintir kir.
Paşê ber bi Xaçerêya Basinê ku weke qada berxwedanê hat hilbijartin, ji 3 milan ve meş hatin lidarxistin
Polîsên ku xwe li coşa girseyê ra-negirtin, 4 caran êriş kirin.
Berxwedana ku ji roja ewil ve li 3 taxan dest pê kirî niha li 12 taxan belav bûye.
Li Amed û Wanê bi hezaran kes li dijî desteserkirina îradeyê meşiyan
Hemwextî vê xelkê Amedê û Wanê jî li dijî darbeya qeyûm li ser pêyan bûn.
Hevseroka Giştî ya DEM Partî, Tulay Hatîmogûllari, Hevseroka Giştî ya DBP’ê Çîgdem Uçar, hevşaredar û nûnerên rêxistinên civaka sivîl jî di çalakiyê de cihê xwe girtin.
Hevşaredarên Xelfetiyê: Em her kesî vedixwînin berxwedanê
Nobeta berxwedanê ya xelkê navçeya Xelfetî a Rihayê jî di roja 5. de dewam kir.
Welatiyên her roj tên pêşiya şaredariyê îro jî berê xwe dan wir û bertek nîşanî qeyûm dan.
Hevşaredarên Xelfetiyê Saniye Bayram û Mehmet Karayilan diyar kirin ku Qeyûm, bingeha xwe ji tecrîdê digire û gotin:
Heke em îro dengê xwe nekin, dê sibe dereng be. Em her kesî vedixwînin berxwedanê.
