Înîsiyatîfa Rojnamevanên Kurd: Nazim û Cîhan bûn şehîdên heqîqetê.
Ew şehîdên ragihandina azad in.
Em ê xeyal û armancên wan bibin serî.
Em ê li keda wan li mîrasa wan xwedî derkevin.
Înîsiyatîfa Rojnamevanên Kurd têkildarî rojnamevan Cîhan Bîlgîn û Nazim Daştaş daxuyanî da ku jia liyê dewleta Tirk a dagirker ve hatin qetilkirin.
Di destpêka daxuyaniyê de hate gotin,”Dewleta Tirk qirker û dagirker e ji heqîqetê, ji rastiyan ditirse.
Derewan dike û dixwaze her kes ji derewên wê bawer bike. Her kî rabe û derewa wê li rûyê wê bixe, dike hedef, dixwaze wan tine bike.
Ev dewleta hov û barbar bi balafirên xwe yên biçek û bêmirov herî dawî li Rojava du hevalên me, du rêwiyên heqîqetê qetil kirin.
Cîhan Bîlgîn û Nazim Daştan. 19’ê Kanûnê dema ji bo şopandina êrişên li ser gelê mezlûm ê Rojava ji Tişrînê berê xwe dabûn navçeya Kobanê Sirînê wesayîta wan hat bombekirin.
Nazim û Cîhan şehîd bûn. Hevalê wan, ajokarê wesaîtê Ezîz Hec Bozan jî birîndar bû.”
Daxuyaniyê bi vî rengî dewam kir:
“Nazim û Cîhan li Bakurê Kurdistanê dest bi karê rojnamevaniyê kiribûn.
Cîhan bûbû belavkarê rojnameya Azadiya Welat û dixwest heqîqet bi rêya vê rojnameyê bikeve her malekê.
Nazim jî li Ajansa Nûçeyan a Dîcleyê dest bi rêwîtiya ragihandina heqetê kiribû.
Dema ku dewleta Tirk a dagirker tevî çeteyên xwe êrişî Kobanê kirin, hingê derbasî Kobanê bûn.
Bi kamera û pênûsa xwe rastiyê ragihandin, li cem gelê xwe bûn.
Li temamê Rojava, ji Kobanê heta bi Reqayê ew bûn neynika nîşandana heqîqetê. Kedeke mezin dan.
Dewleta Tirk a dagirker ku ji siya heqîqetê jî ditirse, xwest bi qetilkirina wan ser rastiyan bigre.
Ji qetilkirina Cengîz Altin heta bi Apê Musa û Gurbetelli Ersoz, ji Denîz Firat heta bi Gulistan û Hêro bi kuştinan nekarî ser hovîtiyên xwe bigre.
Em bi hêrs in, lê em xemgîn nînin. Nazim û Cîhan bûn şehîdên heqîqetê. Ew şehîdên ragihandina azad in.
Em ê xeyal û armancên wan bibin serî. Em ê li keda wan li mîrasa wan xwedî derkevin. ”
Di dawiya daxuyaniyê de ev bang hate kirin:
“Ji bo ku ev hovîtî, ev êriş bên rawestandin, ji bo Nazim û Cîhan em bang li sazî û dezgehên raginandinê dikin, em bang li civaka navnetewî dikin.
Bila li dijî sûcên dewleta Tirk bikevin nav hereketê. Dewleta Tirk şertekî din ê hiqûqa şer binpê kir.
Rojnamevan hedef girt û ew qetil kirin.
Em weke hevalên Nazim û Cîhan, em kedkarên ragihandina azad dava dikin ku dewleta Tirk were mehkemekirin û cezakirin.”
