Li Qamişlo ji bo 7 Şehîdên QSD’ê konê sersaxiyê hat danîn. Beşdarên komên sersaxiyê peyama; Em ji hêza xwe bi bawerin û lazime tu kes li ser navê Kurda biryar nede, em ji şer û aşîtiyê re amade ne.
Ji bo 7 Şehîdên QSD’ê yên bi nas navên Çiyager Rûs (Şivan Mistefa, Şerzad Qamişlo (Mihemed İbrahîm), Agirî Qamişlo (Cudî Elî), Yaşar İbrahîm, Baran Qamişlo (Berces Ebdul Ezîz), Demhat Serêkaniyê (Besam Ugle) û Avaşîn Rûstem Cudî (İruba Elhena) ku li Heleb, Şehba, Seda Tişrînê û KaraQozaqê şehîd bibûn li pêşiya pekrewangeha Delîl Saroxan a bajarê Qamişlo konê sersaxiyê hat danîn.
Bi hezaran kes û endamên Hêzên Ewlekariya Hundirîn, Kongra Îslama Demokratîk, Kongra Star, Sazî û dezgehên cavaka sivîl, Tevgera Civaka Demokratîk (TEV-DEM) û Partiya Yekitiya Demokratîk (PYD) beşdarî konê sersaxiyê bûn û sersaxî dan malbatên her 7 şehîdan.
Piştî deqeyek rêzgirtin Endama Meclîsa Saziya Malbatên Şehîdan Şemsîxan Gulo di konê sersaxiyê de axivî.
Şemsîxan Gulo piştî ku ji malbatên şehîdan re sersaxî xwest, destnîşan kir ku îro hêzên QSD’ê bi felsefeya Rêber Abdullah Ocalan ku li ber xwe didin, li cîhanê deng veda ye.
Şemsîxan Gulo anî ziman ku ew ji hêza xwe bi bawerin û lazime tu kes li ser navê Kurda biryar nede, û diyar kir ku ew ji şer û aşîtiyê re jî amade ne.
Şemsîxan Gulo di berdewamiya axaftina xwe de destnîşan kir ku şehîd û şervan ji bo wan xeta sor in û diyar kir ku ew heya dawî wê piştgiriya hêzên QSD, YPG-YPJ’ê bikin.
Şemsîxan Gulo di dawiya axaftina xwe de bal kişand ser yekrêziya partiyên siyasî ên Kurd û got: “Werin em di vê pêvajoya dîrokî de mala Kurdî ava bikin.”
Endamê Meclîsa Leşkerî QSD’ê a bajarê Qamişlo Agirî Qamişlo piştî ku sersaxî da malbatên şehîdan destnîşan kir ku ew xwedî wê hêzê ne ku heya dawî li berxwe bidin û tola şehîdan hildin.
Agirî Qamişlo bal kişand ser êrişên dewleta Tirk a dagirker û da zanîn ku rojane dijminê gel, di nava planên qirêj de ne û bang li hemû pêkhateyên herêmên Rêveberiya Xweseriya Demokratîk a Bakûr û Rojhilatê Sûryeyê kir ku ji 7 salî heya 70’ê salî di asta seferberiyê de piştgiriya hêzên QSD,YPG û YPJ’ê bikin.
Endama Meclîsa bajêrê Qamişlo PYD’ê Zînê Aslan da zanîn ku şehîdên qehreman di ti fedakariyê de teqsîr nekirine û got: “şehîdên me ji bo parastina Rojavayê Kurdistanê û Bakûr û Rojhilatê Sûryeyê ji Şedadê heya bi Tilhemis, ji Til Rifet û Helebê, heya Minbicê bi salan têkoşiyan û di oxira parastina xaka welat de canê xwe feda kirin.”
Endamê Koordînasyona TEV-DEM’ê Eyîd Îbrahîm jî da zanîn ku Sûrye ketiye qonaxa duyemîn de, çawa ku bi berxwedaniya şehîdan wan qonaxa yekemîn bihûrtiye, wê qonaxa duyem jî bi bihûrin.
Eyîd Îbrahîm di dawiya axaftina xwe de behsa girîngiya yekrêziya partiyên siyasî yên Kurd kir û got: “Em çiqasî xwe li dora hêza xwe bipêçin û yekrêziya xwe ava bikin, ewqasî wê destê me xurt bibe li Şam’ê. Lewma lazime em di çarçoveya “Şerê Gelê Şoreşgerî” de têkoşîna xwe bilind bikin.”
Ji aliyê Meclîsa Saziya Malbatê Şehîdan ve wesîqayên şehîdan hatin xwendin, radestî malbatan hat kirin.
Di konê sersaxiyê de wêneyên Rêber Abdullah Ocalan û şehîdan hatin bilindkirin û dirûşmeyên “Şehîd Namirin”, “Bimire Xiyanet” û “Bijî Berxwedana QSD, YPG-YPJ” hatin berzkirin.
