Dijwar Îsmaîl ku piştî 33 salan ji girtîgeha dewleta Tirk derket, derbasî Rojava bû. Dijwar ku bi awayekî girseyî hat pêşwazîkirin, diyar kir ku ewê heta dawiyê têkoşîna gel bidomîne.
Dijwar Îsmaîl ê ku ji sala 1991`an li Bakurê Kurdistanê ji aliyê dewleta Tirk a dagirker ve hatibû girtin û di 13`ê Kanûna 2024`an hatibû berdan, îro hat mala xwe ya li gundê Sinceqa Sedûn a girêdayî bajarê Amûdê.
Îro di saetên sibehê de bi sedan şêniyên herêmê, endamê meclis û komînên bajêr, dost, heval û malbata Dijwar Îsamîl, bi dirûşmeya “Bijî Berxwedanan Zindanan” ew pêşwazî kir.
Beriya ku Dijwar Îsamîl biçe mala xwe, bi heval û malbata xwe re serdana gora dayika xwe Fexriya Hito û bavê xwe Nesrî Silêman kir.
Bavê Dijwar sala 2015`an û dayika wî jî sala 2020`an wefat kiriye. Dijwar Îsmaîl dayika xwe û bavê xwe herî dawî 2013`an di serdana li zindanê de dîtibûn.
Dijwar Îsamîl li ser gora dayika xwe hestên xwe wiha anîn ziman: “Dayika şoreşgerên Kurdistanê, lawê te hat ji bo tu pê re bibî şoreşger.
Dayika min ji min re digot `kurê min were hesreta min ew e ku bi te re li gundan bigerim û xebatê ji şoreşê re bikim`.”
Piştî serdana goristanê Dijwar Îsmaîl bi karwanekî wesayîtan derbasî mala xwe ya li gundê Sincaqa Sedun bû. Li vir jî mirov û xizmên wî di bin konê li pêşiya malê hatiye vedan Dijwar pêşwazî kirin.
Dijwar Îsmaîl li vir jî axaftinek kir û bixêrhatina mêvanan kir, silavên ji girtiyên azadiyê gihandin welatiyên hazir. Dijwar diyar kir ew ê her xizmetkarê gelê xwe be û got: “Heta dawiya temenê xwe ez ê xebatkar û têkoşerê gelê xwe bim.”
Dijwar Îsamîl destnîşan kir Rêber Abdullah Ocalan ji bo wan û gel mejî ye û got: “bêyî mejî beden nameşe, azadî û jiyana bi rûmet ne pêkane. Serok Apo ji bo me jiyan, mejî, bîrdozî, ronahî û rêya azadiyê ye.”
Di axaftina xwe de Dijwar Îsamîl bal kişand ser berxwedana ku Bendava Tişrînê dijî êrişên dagirkeriyê tê meşandin jî û wiha dom kir: “Gel li wir peyamê dide ku ew ê dest ji rêya xwe ya ber bi azadiyê ve bernedin.
Ji bo avakirina yekitî û biraytiyê kes nikare bibe asteng, ji bilî vê rê hemû rê rêyên koletî û xerabiya welat in.
Dewleta Tirk dixwaze di nava gelan de fitneyê derxîne û herêmê talan bike, bila cîhan bizane em rê nadin xerabiya ku dijmin dixwaze.”
Dijwar Nesrî Îsmaîl (Ridwan Îsmaîl) di 17`ê Îlona 1991`an de ji ber xebatên di nava Tevgera Azadiyê de li Bakurê Kurdistanê ji aliyê dewleta Tirk a dagirker ve hat girtin û cezayê muebedê lê hatibû birîn.
Li gorî qanûnên dewleta Tirk, kesên ku cezayê muebetê digirin, piştî 30 salên di girtîgehê de, tên berdan. Cezayê Dijwar Îsmaîl 5`ê Îlona 2021`an bi dawî bû, lê rêveberiya girtîgeha dewletê, 3 salan bi hincetên cuda serbestberdana wî taloq dikir.
