Hêzên Ewlekariya Hundirîn a Bakur û Rojhilatê Sûriyê ragihand kir ku ji der di şahiyên sersalê de bêserûber gulle reşandine, 40 kes hatine girtin.
Ji aliyê din ve Hêzên Ewlekariya Hundirîn jî li bajarê Hesekê 2 bazirganên çekan û madeyên qedexekirî girtin.
Li herêmên Bakûr û Rojhilatê Kurdistanê di salên dawî de ji ber di şahî û merasîmên oxirkirinê de gelek caran bê serûber gulle tê reşandin, ev rewş xetereyên mezin bi xwe re tîne.
Di encamê de heta niha gelek sivîl birîndar bûne û jiyana xwe ji dest dane.
Şênî jî ji ber vê yekê bi hêrs in û dixwazin rêxistinên ewlekariyê pêşî li vê bigirin.
Hêzên Ewlekariyê ji ber vê yekê reşandina gulleyan qedexe kir.
Lê tevî vê yekê di şahiyên sersala 2020’an de li gelek bajarên Bakur û Rojhilatê Sûrî dîsa bêserûber gulle hate reşandin.
Berdevkê Hêzên Ewlekariya Hundirîn a Bakur û Rojhilatê Sûriyê Elî El-Hesen diyar kir ku ew hewl didin vê rewşa xeter bi dawî bikin û rê li ber qezayan bigirin û got,
“Hêzên Ewlekariya Hundirîn ji bo ewlehiya şêniyan biparêzin, dewriyeyên xwe zêde kirin û bendên xwe li tevahiya bajar û bajarokan belav kirin.”
El-Hesen eşkere kir ku hêzên wan 40 kesên ku di şahiyên sersalê de bêserûber gulle reşandine girtin, çekên wan desteser kirin û ew radestî dadgehên sivîl kirin.
Elî El-Hesen, bang li şêniyan kir ku li gorî biryarên Hêzên Ewlekariyê tevbigerin û bi wan re bibin alîkar.
HÊZÊN EWLEKARIYA HUNDIRÎN
LI BAJARÊ HESEKÊ 2 BAZIRGANÊN ÇEKAN Û MADEYÊN QEDEXEKIRÎ GIRTIN
Li aliyekî din Hêzên Ewlekariya Hundirîn li bajarê Hesekê 2 bazirganên çekan û madeyên qedexekirî girtin.
Hêzên Ewlekariya bi bazirganan re gelek çek, çebilxane û madeyên hişbir jî dîtin.
