Xelkê Wargeha Mexmûrê bi boneya Cejna Remezanê serdana gorên şehîdan û Saziya Malbatên Şehîdan kirin.
Li Kerkûkê jî bi boneya hatina Cejna Remezanê, welatparêz û malbatên şehîdan serdana gorên şehîdan kirin û soza şopandina têkoşîna wan dubare kirin.
Xelkê Wargeha Penaberan a Şehîd Rûstem Cûdî (Mexmûr) bi boneya Cejna Remezanê bi pêşengtiya malbatên şehîdan ji Saziya Malbatên Şehîdan bi meşekê berê xwe dan goristana wargehê.
Piştî girse gihişt goristanê, deqeyek rêz ji bo tevahî şehîdên Tevgera Azadiya Kurdistanê hate girtin.
Piştre li ser navê malbatên şehîdan yên wargehê birayê Şehîd Axîn, Selman Şiwêdî axivî û got:
Me sozek daye şehîdan ku emê li pey soza xwe bin, erka ku bikeve li ser milê me emê berdewam bikin.
Em dubare vê cejnê li Rêber Apo, hevrêyên wî û tevahî gelê Kurd pîroz dikin.
Gel li ser goristanê dirûşmeyên ‘Bê Serok Jiyan’ û ‘Bijî Serok Apo’ berz kirin.
Bi boneya cejna Remezanê Xelkê Mexmûrê ji bo nimêja cejna Remezanê serê sibê berê xwe dan mizgeftan.
Piştî nimêja cejnê gel bi awayek girseyî çûn ser goristanê û cejn pîroz kirin.
Piştre ji wir jî berê xwe dan Saziya Malbatên Şehîdan a Mexmûrê, li wir cejna hev pîroz kirin.
Li ser navên gelê Mexmûrê Mele Elî Sipêrtî li saziyê axivî û anî ziman ku ew bi hêvîne ev cejin bibe wesîleya azadî û aştiya mayînde û wiha bi lêv kir:
Em wek gelên penaber bang li tevahî gelê Kurd dikin ku yekîtiya xwe çêbikin û bi hevre aram jiyan bikin.
Li Kerkûkê bi boneya cejna Remezanê serdana gorên şehîdan hat kirin
Li Kerkûkê bi boneya hatina Cejna Remezanê, azadîxwaz, welatparêz û malbatên şehîdan serdana gorên şehîdên têkoşîna azadiyê kirin û soza şopandina têkoşîna wan dubare kirin.
Di serdana xwe ya li ser goran de, beşdaran daxwaz kirin ku yekîtiya gelê Kurd a netewî pêk were û piştgiriya banga dîrokî ya Rêber Apo bê kirin.
Siyasetmedarê Kurd Husên Kerkûkî axivî û diyar kir ku ev cejna îsal ji salên berê cuda ye û wiha anî ziman:
Ji ber ku guherîneke girîng ya siyasî li herêmê çêdibe.
Bi taybetî piştî banga dîrokî ya Rêber Apo ya ji bo aştiyê û civaka demokratîk ku ev bang li hemû cîhanê deng vedaye, guherîneke gelek mezin û dîrokî ya siyasî çêbûye.
