Komên şanoyê yên ku di Festîvala Şehîd Yekta Herekol de beşdar bûne, di şanoyên xwe de balê dikişînin ser hemeleyên Enfalê yên sîstematîk ên li dijî gelê Kurd li Başûrê Kurdistanê û şervanekî Bakur û Rojhilatê Sûriyeyê ku welatê xwe ji komên tundraw diparêze.
Festîvala 7’an Şanoyê ya Şehîd Yekta Herekol a bi dirûşma “Welatparêzê rastîn hunermendekî wêrek e” di roja xwe ya 5’an de didome.
Di roja 5’an a festîvalê de ku li Navenda Mihemed Şêxo ya Çand û Hunerê ya bajarê Qamişlo tê lidarxistin, koma Argêş a ji Rojhilatê Kurdistanê bi lîstika xwe ya bi navê “Spîro” ya ji nivîsara Erşak Reûf Gonbedî û derhêneriya Maêde Darlekî beşdar bû.
Şano li ser komkujiya Helebceyê ye, ku rejîma Iraqê di 16’ê Adara 1988’an de bi balafiran êrişên kîmyewî li dijî sivîlan pêk anîn û di encamê de nêzî 5 hezar kes di nav de jin û zarok hatin qetilkirin.
Şano balê dikişîne ser bêhna sêvan a ji ber êrişa kîmyewî ya Sedam Hisên li dijî bajarê Helebceyê, belav bûye. Her wiha di şanoyê de bal li ser pirsgirêkên tenduristî li gel zarokan piştî kişandina gazên jehrîker, hat kişandin. Di heman demê de bal li ser hemleya komkukiyan a Enfalê jî hat kişandin a ku ji 1986‛an heta 1989’an dom kiriye û di encamê de herî kêm 180 hezar Kurd hatin qetilkirin..
Piştre koma Twatra Hinar a ji bajarê Qamişlo lîstikek bi navê “Yek Dîşek” pêşkêş kir. Nivîskarê şanoyê Sebah El Enbarî, amadekar û wergervan Mihemed Eşref û derhêner Şevzan Fewaz Mihmûd in.
Lîstik behsa şervanekî ku ji hêla komên cîhadîst ve hatibû dorpêçkirin û parastina welatê xwe dike ku mirovahiyê ji hovîtiya terorê rizgar bike, dike.
Di lîstikê de bal li ser tundî û hovîtiya komên tundraw wekî kuştina sivîlan, pêkanîna teqînan, serjêkirina mirovan û bikaranîna navê xwedê û olan, hat kişandin.
Li wir şervan li hemberî komên tundraw ên ku dixwazin wî dîl bigirin û piştre bi cenazeyê wî bilîzin ku tirsê bixin dilê mirovahiyê, li ber xwe dide ku ew derbasî xaka wî welatê wî nebin. Şer giran dibe û beriya şervan di destê komên tundraw de dîl were girtin, xwe feda dike û di wijdana neteweya xwe de nemir dimîne.
Festîvala 7’an a Şanoyê ya Şehîd Yekta Herekol li ser asta Sûriyeyê û Kurdistanê di bin dirûşma “Welatparêzê rastîn hunermendekî wêrek e” bi organîzekirina Tevgera Çand û Hunera Demokratîk a Mezopotamyayê (TEV-ÇAND) û Komîna Şanoyê li ser dikên navendên çandê yên bajarê Qamişlo didome. Festîval heta 11’ê Nîsanê dewam dike.
Festîvala Şanoyê ya Şehîd Yekta Herkol beriya 7 salan li Bakur û Rojhilatê Sûriyeyê ji bo hurmetdayîna nivîskar û şanogerê Kurd Yekta Herkol ku di 27’ê Adara 2004’an de li Qada Seedellah El Cabirî ya bajarê Helebê xwe şewitandiye tê lidarxistin. Şehîd Yekta Herekol ji bo şermezarkirina komploya navneteweyî ya li ser Rêber Abdullah Ocalan, di Roja Şano ya Cîhanê de agir berda canê xwe.
