Li gelek bajarên Tirkiyê vexwandina Serokê desthilata demkî ya Sûriyê Ehmed El-Şara ‘Colanî’ ji bo Foruma Dîplomasiyê ya Antalyayê hat şermezar kirin û ev bang hate kirin:
“Li hemberî komkujiyên Elewiyan ên li Sûriyê bêdeng nemînin.”
Li gelek bajarên Tirkiyê û Bakurê kurdistanê vexwandina Serokê desthilata demkî ya Sûriyê Ehmed El-Şara ‘Colan’ ji bo Foruma Dîplomasiyê ya Antalyayê, hat şermezarkirin.
Li Edeneyê pêkhateyên Elewî û jin, vexwandina Ehmed El-Şara ji bo Foruma Dîplomasiyê ya Antalyayê, bi çalakiyekê şermezar kirin.
Di çalakiyê de li ser navê Piştevaniya Mor Pelîn Çîçek mafê axivî û bal kişand ser sûcên HTŞ’ê û got:
Li Sûriyê jin tên kuştin, em bêdeng namînin.
Em ê çalakiyên xwe yên ku me di 11’ê Nîsanê de da destpêkirin, bi Dîwara Aşitiyê ku em ê li sînorê Sûriyê bi jinan re ava bikin, bidomînin.
Jinên li Sûriyê ne bi tenê ne. Em ê bibin dengê jinan.
Em bang li hemû jinan dikin ku di 24’ê Nîsanê de li Samandagê piştevaniya jinên li derveyî sînor bikin.
Li Antalyayê jî saziyên Elewî li pêşiya Şaxa Altinova ya Komeleya Çandê ya Pîr Sultan Abdal (PSAKD) daxuyaniya çapemeniyê dan.
Hêzên Ked û Demokrasiyê jî tevlî çalakiyê bûn û dirûşmeyên “Bêdeng nemîne, ji Colanî re na” û “Kujer wê here, aşitî wê were” hatin berzkirin.
Di çalakiyê de rêveberê Şaxa Altinova ya PSAKD’ê Abdurrahman Karadag axivî û destnîşan kir ku li Sûriyê komkujiyên li dijî Elewiyan dewam dike û berpirsê vê jî Serokê HTŞ’ê Colanî ye û got:
Me di tevahiya dîrokê de serî li hemberî kujeran netewand û em ê netewînin.
Her wiha Platforma Ked û Demokrasiyê ya Tarsûsê jî li Qada Yarenlîk daxuyaniya çapemeniyê da.
Di daxuyaniyê de bal hat kişand ser hatina Ehmed El-Şara ji bo Tirkiyê û wiha anîn ziman:
Ehmed El-Şara sûcdarê şerê ye. Mixabin hikûmeta AKP’ê ji serî ve piştgirî da van çeteyan, wan mezin kir, alîkariya lojîstîk û çek da wan. Ev hevkarî, hevkariya sûcê qirkirinê ya li Sûriyê ye.
Saziyên Elewî yên Stenbolê jî li qada Rihtim a Kadikoyê li hev civiyan.
Di çalakiyê de dirûşmên “Kujer, ji welatê me bicehime”, “Kujer HTŞ, hevkar AKP”, “Bila qirkirina Elewiyan a li Sûriyeyê bi dawî bibe” hatin gotin.
Her wiha di çalakiyê de daxuyaniya çapemeniyê ya hevpar ji aliyê Cîgirê Serokê Federasyona Elewiyên Bektaşî Îbrahîm Karakaya ve hat xwend.
