Endamê Komîteya Rêveber a PKK’ê Dûran Kalkan pêvajoya piştî banga rêber Apo nirxand û got:
”Di mijara pêvajoyê de daxuyaniyên erênî têne dayin, lê belê gavên pratîkî nehatine avêtin”
Dûran Kalkan destnîşan kir ku ji bo pêvajo veguhere çareseriyê divê her kes bi berpirsyariyê rabe.
Endamê Komîteya Rêveber a PKK’ê Dûran Kalkan ji televîzyona Medya Haber re axivî û asta heyî ya pêvajoyê nirxandin kir.
Dûran Kalkan destpêkê berxwedana dîrokî ya Îmraliyê û Rêber Apo bi rêzdarî silav kir û got:
Rêber Apo daxuyaniyeke ji her kesî wêdetir a ji bo çareseriyê da.
Rewşa heyî ferz dike ku pêngava navneteweyî ya ji bo azadiya fîzîkî ya Rêber Apo bi berfirehî bê meşandin.
Li ser vê bingehê li Romayê konferansek, civînek, nîqaş hatin kirin, girîng bû.
Dûran Kalkan: Rêber Apo tenê dikare kongreya PKK’ê lidar bixe
Dûran Kalkan diyar kir ku daxuyaniya Rêber Apo ya ku bi sernavê ‘Banga Aştî û Civaka Demokratîk’ a ku di 27’ê Sibatê de hate kirin, bi rastî jî xwedî naverokeke kûr, bangeke dîrokî bû û wiha anî ziman:
Biryarên ku tê xwestin di kongreya PKK’ê de bê wergirtin, tenê Rêber Apo dikare bide wergirtin û tenê Rêber Apo dikare bide pêkanîn.
Lewma ji bilî Rêber Apo kes nikare wan biryaran bide wergirtin, nikare bide pêkanîn.
Em li pişt vê nêrîn û daxuyaniya xwe ne.
Dûran Kalkan: Hevdîtina Erdogan û şandeya Îmraliyê girîng bû
Her wiha Kalkan da zanîn ku hevdîtina Serokkomarê Tirkiyê bi Heyeta Îmraliyê ya DEM Partiyê re girîng e û dibêje:
Niha daxuyanî û gotinên erênî û kêfxweşiyê hene, pratîk wê çawa bibe em nizanin.
Bi rastî jî li ser naveroka wê agahiya me nîne. Gelo biryar li ser hin tiştan hate dayin, yan jî hêvî û bendewarî hate ser ziman, encamên wê çawa wê bikevin pratîkê em tiştekî nizanin.
Em hêvî dikin wê erênî be û pêvajoyê bi pêş ve bibe.
Dûran Kalkan: Tevî agirbestê jî êrişên Tirkiyê dewam dikin
Dûran Kalkan got, Fermandariya me ya Biryargeha Navendî, Navenda Ragihandin û Çapemeniyê ya HPG’ê rojane êrîşên li ser gerîla, encamên wê eşkere dikin.
Li aliyê din êrîş ne tenê ji aliyê leşkerî ve ye. Desthilatdariya heyî bi heman rengî êrîşî civakê, êrîşî qada siyasetê dike.
Dûran Kalkan: Gotin têrê nake, gavên pratîkî divê
Kalkan anî ziman ku gotin têrê nake, gavên pratîkî divê û wiha domand:
Devlet Bahçelî destpêkê rabû, xwest Rêber Apo bê Enqereyê, li Meclîsê biaxive.
Lê belê di gotinê de ma. Desthilatdariya heyî nakeve nava guhertineke siyaset û mejî ku hebûna Kurdan, weke gel hebûna Kurdan, mafên demokratîk qebûl bike.
Em dixwazin pirsgirêkên bi vî rengî bi mejiyekî demokratîk, tifaq û yekîtiya demokratîk, bi beşdariya her kesî bê çareserkirin.
Dûran Kalkan: Gelê me wê sûd ji karê dokûmanterê bigire
Di dawiyê de Dûran Kalkan wiha bi lêv kir:
Rêber Apo bang li desthilatdariyê jî kir, muxalefetê jî kir, li hemû hêzên cîhanê kir.
Her kes Rêber Apo û PKK’ê nîqaş dike. PKK çi ye, rastiya Rêber Apo çi ye, dokûmanter xwedî naverokeke girîng e.
Li gel sûdwergirtina ji berhem û nirxandinên Rêber Apo em di wê baweriyê de ne ku gelê me, bi taybetî ciwan û dostên me wê sûdê ji vî karê dokûmanterê jî werbigirin.
Em di wê baweriyê de ne ku karên bi heman rengî wê hîn bi serketî bikin.
