Her ku diçe nerazîbûnên li dijî ‘Danezana destûrî’ a desthilata Şamê zêde dibe.
Jinên çalakger ên ji Bakur û Rojhilatê Sûriyê bertek nîşanî vê destûrê dan û wiha anîn ziman:
”Nebûna jinan di navendên biryardayînê de li ser siberoja Sûriyeyê gef e, divê jin tevlî hikumeta nû bibe û di rola xwe di cihê biryarê de bigire”.
Bertek û nerazîbûnên li dijî ‘Danezana destûrî’ a desthilata Şamê dewam dikin.
Taybet ku ev danezan rola jinan paşguh dike.
Jinên çalakger û pêşeng ev yek weke dewama siyaseta tunekirina jinan di qadên siyasî û civakî li Sûriyê bi nav kirin.
”Nebûna jin di hikumeta nû de nîşaneya paşguhkirin û bidûrxistinê ye”
Berdevka Meclisa Giştî ya Jinan a Partiya Sûriya Pêşerojê Fatme El Elî dibêje:
Nebûna jinan di navendên biryardayînê de li ser siberoja Sûriya demokratîk ku tevahî Sûriyeyî hêvî dikin, xeterî ye.
Fatme anî zima ku ew dizanin nebûna jinan di tu aliyekê de tê wateya nebûna demokrasî û azadiya rasteqîn, ji lewra em bang dikin ku jin di tevahî aliyên siyasî, leşkerî û dadweriyê de hebin.
Ji ber ku jina Sûriyeyê di gelek qadan de karînên xwe îsbat kir, bi taybet di nava projeya Rêveberiya Xweser a li Bakur û Rojhilatê Sûriyeyê de.”
Mamosteya Zanîngeha Şerq Newroz Muslim jî got:
Paşguhkirina jinan di avakirina hikumeta nû de ne tesadufî ye, berovajî divê bi rêya hevgirtina jinan li hundir û derve li hember wê nêrîna dûrxistinê were sekinandin.
Divê nebûna jinan a îro di jiyana siyasî û civakî de baş were xwendin.
Wekî ku di destûra nû de zelal bû ku garantiya mafên jinan tune bû û hebûna jinek bi tenê di hikumeta nû de nîşaneya aşkera ya siyaseta paşguhkirin û bidûrxistinê ye.
”Jina Sûrî beşek resen ji dîrok û şarestaniya vê civakê ye”
Newroz diyar kir ku şer valahiyek çêkir û olperestan xîtabên olperestî kirin û wê jî hişt jin zêdetir werin bidûrxistin û wiha pê de çû:
Jina Sûriyê beşek resen ji dîrok û şaristaniya vê civakê bû û hîn jî wiha ye.
Em vê reşkirinê ku hin alî hewl didin îro, li ser jinê di bin perdeya hikumeta nû de ferz bikin, qebûl nakin.
Hevseroka Nivîsgeha Têkiliyan a Partiya Sûriya Pêşerojê Meha El Ubeyd got:
Em bi hêvî ne jin di wezaretên bingehîn de bibînin, weke me di tecrûbeya Rêveberiya Xweser de dît, ku jin bi rêya ji sedî 50 cihê xwe di biryardayînê de digire.
Nebûna jinê di navendên biryardayînê de wê siberojeke demokratîk ji Sûriyê re pêk neyne.
Em bang li desthilata Şamê dikin ku li nêrîna xwe ya siyasî vegere û nûnertiya adilane û berfireh a jinan di tevahî qadan de misoger bike.
