Çend roj ji cejna qurbanê re maye. Îsal milyonek û 400 hezar kesî ji bo hecê berê xwe dan Mekkê.
Rayedarên Erebistana Siûdî jî çuyîna Mekkê ya 270 hezar namzetên heciyan ku destûra wan tune bû, astengkirin.
Li Erebistana Siûdî tevî germa zêde jî, hecê vê hefteyê bi rengekî fermî destpê kir û zêdeyî milyonek 400 hezar kes gihîştin Mekkê.
Hat diyar kirin îsal zêdeyî 250 hezar kesên erkdar û bi hezaran xebatkarên tenduristiyê ji bo deverên sarkirin û sîhê wê piştgiriya hecîyan bikin.
Her wiha wê bi rêya hişê çêkirî û teknolojiya dronê liv û tevgera girseyê bê şopandin û herikîna wan bi vî rengî bê kirin.
Ketina mekkê ya 270 hezar namzetên heciyan hat astengkirin
Hat ragihandin piştî ku sala par, ji ber germahiya zêde gelek heciyan jiyana xwe ji dest dan, rayedarên Siûdî serdanên Hecê yên ne-qanûnî asteng dikin.
Hat diyar kirin heta niha nêzî 270 hezar kesên ku destûra wan tune ye, ketina wan ya Mekkê hatiye astengkirin.
Li gorî hikumeta Siûdiyê qelebalixiya zêde ya di dema hecê ya li Mekkeyê, ji ber kesên bê destûr pêk tê.
Her wiha tê diyarkirin hezar û 300 kesên ku par ji ber germaniya zêde mirin, piranî kesên bê destûr bûn.
Ji bo kesên ku bê destûr biçin hecê wê 5 hezar dolar ceza bê dayîn û wê bên dersînor kirin.
Ev pêkanîn hemwelatiyên Erebistana Siûdî û yên li wê derê niştecih bûne jî di nava xwe de dihewîne.
Rayedar diyar dikin ji ber pîvanên hecê binpêkirine, ceza li 23 hezar welatiyên Siûdî hatiye birrîn, û lîsansên 400 şirketên hecê jî hatine betalkirin.
Ji ber di van salên dawiyê de hecî îbadetên xwe di saetên rojê de dikin ji germahiya zêde bi bandor dibin.
Hêjayî gotinê ye her sal derdora 2 mîlyon kes ji bo hecê serdana Erebistana Siûdî dikin.
Ji ber hejmara zêde û pê li hevkirinê gelek kes jiyana xwe ji dest didin.
