Di êrişên hêzên Rûsyayê yên li ser Ukraynayê de kesek hat kuştin û hinek birîndar bûne.
Artêşa Rûsyayê ragihand ku wê di saetên şevê de 8 dronên Ukraynayê xistine xwarê.
Li aliyê din Rojnameya New York Times îdia kir ku Rûsya dê ji ber êrîşên li ser balafirgehên leşkerî bi ciddî bersivê bide Ukraynayê.
Li deverên cuda yên Ukraynayê operasyonên leşkerî dewam dikin.
Hate ragihandin ku di êrişên şevê din ên hêzên Rûsyayê yên li ser herêma Xarkivê de kesek hatiye kuştin û hin kes birîndar bûne.
Serokê Rêveberiya Leşkerî ya Bajarokê Balaklia yê li Xarkiv ê nêzîkî sînorê Rûsyayê Vitaly Karabanov agahî li ser Telegramê parve kirin û got:
“Li bajarokê biçûk şîrketeke taybet hate hedefkirin. Di encamê de karmendek hate kuştin û hin kes jî birîndar bûn.”
Çavkaniyên herêmî ragihand ku di encama êrişan ziyanên madî û canî çêbûn û şer di navbera hêzên Rûsyayê û yên Ukraynayê de berdewam dikin.
Her wiha Rûsyayê ragihand ku wan di şeva borî de 8 dronên Ukraynayê xistine xwarê.
NYT: Rûsya wê bersiveke cidî bide Ukraynayê
Li aliyê din Rojnameya New York Times (NYT) îdia kir ku Rûsya dê ji ber êrîşên li ser balafirgehên leşkerî bi ciddî bersivê bide Ukraynayê.
Nûçeya New York Times, ku li ser daxuyaniyên rayedarên hikûmeta Dewletên Yekbûyî yên Amerîkayê ku navên xwe eşkere nekirine, behsa êrîşên ku ji hêla Servîsa Ewlehiyê ya Ukraynayê (SBU) ve li ser balafirgehên leşkerî yên cuda yên li Rûsyayê hatine kirin, kir.
Rayedaran diyar kirin ku operasyonê ne tenê zirar da kapasîteya stratejîk a Rûsyayê, lê di heman demê de nîşan da ku Ukrayna dikare bi karanîna wesayîtên hewayî yên bêmirov ên 600 dolarî balafirên leşkerî yên bi nirxê zêdetirî 100 mîlyon dolarî hilweşîne.
Rayedaran îdia kirin ku ev êrîş dê nebin sedema kêmkirina operasyonên Rûsyayê li Ukraynayê û gotin ku ew bersivek “cidî” ji Moskowê pêşbînî dikin.
Rûsya: Di êrîşa Ukraynayê de hin balafirên leşkerî zirar dîtin
Her wiha daxuyaniyek nivîskî ya Wezareta Parastinê ya Rûsyayê diyar kir ku Ukraynayê bi dronan êrîşî baregehên hewayî yên leşkerî yên li herêmên Murmansk, Irkutsk, Ivanovo, Riyazan û Amur kiriye û hin balafir jî agir pê ketine.
Daxuyaniyek ji hesabê Telegramê yê Servîsa Ewlehiyê ya Ukraynayê (SBU) îdia kir ku ji sedî 34’ê balafirên şer ên ku moşekên kruvaz ên stratejîk hildigirin di êrîşên li ser balafirgehên leşkerî yên cuda yên Rûsyayê de bi dronan hatine xistin.
