Li Tirkiyê ‘Mafê Hêviyê’ ji bo rêber Apo û tevahî girtiyan pêk nayê..
Tevî ku gelek caran banga pêkanîna vî mafî hatiye kirin jî, lê heta niha Tirkiyê paşguh kiriye.
Hevserokê Şaxa Amedê ya OHD’ê parêzer Muhîttîn Mûgûç geşedanên siyasî yên piştî banga ji Îmraliyê, nirxand û got:
”Mafê hêviyê ne tenê meseleyeke hiqûqê, di heman demê de Tirkiyê bi demokrasiyê re rû bi rû dihêle.
Bi banga Rêber Apo ya Aştî û Civaka Demokratîk re li Tirkiyê pêvajoya çareseriya demokratîk, careke din kete rojevê.
PKK’ê jî li gorî bangê tevgeriya û biryar da ku têkoşîna çekdarî bi dawî bike.
Bi pêvajoya diqewime re, gavên hiqûqî û sererastkirinê tên hêvîkirin, mijarên ku destpêkê guhertin lê bên kirin jî mafê hêviyê û guhertina zagona bingehîn e.
Têkildarî mijarê, Hevserokê Şaxa Amedê ya Komeleya Hiqûqnasên Ji bo Azadiyê (OHD) parêzer Muhîttîn Mûgûç axivî.
Parêzer Muhîttîn Mûgûç: Divê qanûna înfazê li Tirkiyê bê reformkirin
Muhîttîn Mûgûç diyar kir ku ev pêvajo tenê ne siyasî, di heman demê de xwedî asteke hiqûqî ya kûr e û got:
Ev mesele pirsgirêkeke çêkerî ya Tirkiyê ye.
Mafê hêviyê pênaseyeke ku bi keda Dadgeha Mafên Mirovan a Ewropayê (DMME) a têkildarî cezayê îdamê û hepsa muebedê ya girankirî, derketiye holê.
Mûgûç da zanîn ku rewşa rêber Apo sembolîk e û dibêje:
Li Tirkiyê Kurd tenê di bin navê nasnameya “Tirk” de dikarin bibin xwedî maf û ev rewş tune hesibandina zagona bingehîn e.
Çareserî jî naskirina hiqûq û demokrasiyê ye.
Ji bo mafê hêviyê bikeve meriyetê, divê di qanûna înfazê de reformeke berfireh çêbibe.
Ne tenê birêz Ocalan, gelek girtî di vê çarçoveyê de ne.
Her rojeke li girtîgehê, rojeke ku mafê hêviyê tê binpêkirin.
Heta ku newekheviyên di qanûna înfazê de neyên derbaskirin, mafê hêviyê bi rastî pêk nayê.
“Pêkanîna mafê hêviyê li Tirkiyê pêwîstiyeke mirovî ye”
Muhîttîn Mûgûç diyar kir ku mafê hêviyê ne tenê meseleyeke hiqûqê, di heman demê de Tirkiyeyê bi demokrasiyê re rû bi rû dihêle û wiha bi lêv kir:
Mafê hêviyê li Tirkiyê ezmûna rast a hiqûq û demokrasiyê ye.
Ji bo ceribandina samîmiyeta pêvajoya çareseriyê, mafê hêviyê girîng e.
Naskirina vî mafî ne siyasî, pêdiviyeke mirovî û hiqûqî ye.
Mûgûç axaftina xwe wiha bi dawî kir:
Eger bi rastî jî çareserî tê xwestin, divê ev maf were bicihanîn û sererastkirina ceza û înfazê were guhertin.
Mafê hêviyê ne tenê girtiyan, wijdana hevpar a temamiya civakê eleqeder dike.
