Cotkarên li gundewarên bajarê Til Birakê gazinan ji buhayên kêm ên berhemên xwe dikin.
Cotkaran diyar kir ku ev buha têra sermaya ku wan di çandiniyê de xerc kirine, nakin.
Her wiha bang li aliyên têkildar kirin ku pêdiviyên çandiniyê, nemaze mazotê, peyda bikin.
Li gundewarê Til Birakê hejmarek cotkar bacan û xiyaran diçînin.
Cotkar ji ber buhayên kêm ên bacan û xiyaran ên li bazaran bi gazinc in.
Cotkaran diyar kir ku nirxê firotina xiyar û bacanan, lêçûna çandiniyê dabîn nakin.
Derbarê mijar de hejmarek cotkaran diyar kirin ku zêdebûna her du cureyên sebzeyan û bêrêxistinbûna bazarê, bûye sedema daketina buhayan.
Cotkar: Buhayên sebzeyan lêçûna xwe dernaxin
Cotkar dibêjin ku buha ne li gorî lêçûnên çandiniyê ne, nemaze yên di baxçeyên sergirtî ku çandina wan lêçûneke zêde dixwaze.
Cotkar Emîn El Muxlif ê ji gundê Til Ezan ê Til Birak e nerazîbûna xwe ya li hember buhayên heyî axivî.
Emîn El Muxlif desnîşan kir ku dema wî bacan û xiyar berhev kirin û ew birin bazarê tişa wan dît ku buhayên li wir ji bo cotkaran ne adil in û ne li gorî mesrefên çandiniyê bûn û wiha got:
“Bihabûn pir kêm bûn lê ji tirsa xirabûnê ez neçar mam ku berhemên xwe bi buhayekî kêmtir ji sermayeya xwe, bifiroşim.”
Her wiha El Muxlif bal kişand ser kêmbûna desteka çandiniyê ji aliyê saziyên têkildarî ve, bi taybetî mazota ji bo xebitandina pompên avdanê û bihabûna semadê .
Cotkarên Til Birakê banga avakirina komîteyên kontrolkirina buhayan kir
Herî dawî El Muxlif banga destwerdana lezgîn li saziyên eleqedar kir ku çandinî bê parastin û bazirgan teşwîq bibin ku karê xwe bidomînin û wiha domand:
“Em dixwazin komîteyên pispor di hundirê sûkê de kontrolê bikin, buhayên sebzeyan li gorî lêçûna çandinê diyar bikin.”
