Rêber Apo peyamek ji konferansa “100 saliya Serhildana Şêx Seîd,” re şand.
Rêber Apo diyar dike Şêx Seîd, li dijî polîtîkayên înkarê yên ku îradeya Kurdayetiyê hedef digirtin, helwesteke xurt nîşan daye.
Rêber Apo dibêje, “Xeta Şêx Seîd dema ku bi paradîgmaya neteweya demokratîk re bû yek wê bigihêje armanca xwe ya rastîn.”
Rêber Apo peyamek bi sernavê “Ji bo Konferansa Sedsaliya Serhildana 1925’an” ji Konferansa “100 Sedsaliya Serhildana Şêx Seîd re şand, Şêx Seîd û hevalên wî bibîranî.
Rêber Apo diyar dike rastiya dîrokî ya Şêx Seîd ji serhildanekê wêdetir e û wiha dibêje,
“Ev rastî têkoşîneke kevneşopî ya ji bo hebûnê ye ku di bîra kolektîf a gelê Kurd de şopên kûr hiştiye.
Ew têkoşîn serhildana civaka Kurd e ku bi bawerî, kevneşopî û îradeyê li dijî zihniyeta yekperest a ferzkirî derketiye holê.”
“Şêx Seîd li dijî înkarkirina îradeya Kurdan helwesteke kûr nîşan da”
Rêber Apo diyar dike Şêx Seîd, wekî pêşengekî di şert û mercên serdema xwe de, berpirsiyariya civakî girtiye ser xwe û li dijî polîtîkayên înkarê yên ku îradeya Kurdan hedef digirtin, helwesteke xurt nîşan daye.
“Ev serhildan ne tenê bertekeke siyasî ye, di heman demê de bertekeke civakî ye jî. Ev bertek îfadeyeke dîrokî ya dilsoziya Kurdan a bi heqîqeta xwe re ye.
Siyaseta navendîperest û yek-nasnameyî ya ku di salên destpêkê yên Komarê de hat meşandin, armanc dikir ku gelê Kurd ji hebûna wan dûr bixe.
Şêx Seîd got ‘Me edalet dixwest, lê we cezayê îdamê da’ û bi vê gotinê li dijî vê siyasetê dengê gelekî bir heta sêdarê.
Her wiha, gotinên wî yên wek ‘Birêz dozger, ka em diçûn bi hev re berx bixwin’ îfadeya komployê ye ku ew pê re rû bi rû maye.
Gotinên wî yên wek ‘Bêguman neviyên min wê tola min hilînin’ hêviya berxwedanê ye ku wî ji bo nifşên siberojê hiştiye.”
Rêber Apo destnîşan dike ku mîna her berxwedaneke dîrokî, serhildana bi serokatiya Şêx Seîd jî, şert û mercên serdema xwe hildigire navxwe.
“Xeta Şêx Seîd dema bi netewa demokratîk re bibe yek wê watedar bibe”
“Girêdana wê serhildanê bi têkoşîna azadiyê ya îro re, bi derxistina dersên binyatî û ji nû ve avakirina berdewamiya dîrokî li ser xeteke azadîxwaz û demokratîk mimkun e.
Min ev kevneşopî ji bo veguherîna şoreşgerî ya Kurdbûna azad wek bingeh girtiye dest. Têkoşîna ku ez dimeşînim armanc dike ku mîrata berxwedanê ya watedar a raboriyê bi pergala demokratîk, piralî û aştiya civakî ya siberojê re bîne cem hev.
Xeta Şêx Seîd dema ku bi paradîgmaya neteweya demokratîk a îro re bibe yek, ew ê wateya xwe ya rastîn bi dest bixe.
Kurdbûneke azad bi dilsoziya bi dîrok, çand û nirxên exlaqî-siyasî yên gel re mimkun e. Divê gelê me di vê mijarê de baldar be û mîrateya pîroz a ku rêberên dîrokî li dû xwe hiştiye biparêze.”
