Doh Konseya Ewlekariyê ya Neteweyên Yekbûyî civînek li dar xist.
Li wir rewşa Xezayê hat nîqaşkirin.
Li ser rewşa Xezayê UNICEF da zanîn li Xezayê heta niha zêdetirî 17 hezar zarok mirine.
Rêvebira UNICEFê Catherine Russell doh ji Konseya Ewlekariyê ya Neteweyên Yekbûyî re got her yek ji milyonek zarokên li Xezayê êşên mezin dikişîne û dê bi encamên jiyanê re rû bi rû bimîne.
Li gorî UNICEF’ê, di şerê berdewam ê li Xezayê de heta niha zêdetirî 17 hezar zarok mirine, bi navînî 28 zarok her roj dimirin.
Catherine Rusell di axaftina xwe de wiha got:
“Daneyên ji Xezayê yên di 21 mehên dawî yên şer de zêdetirî 17 hezar zarok mirine û 33 hezar jî birîndar bûne.
Li ser vê yekê bifikirin: Nêzîkî du salan e her roj, dersxaneyek tijî zarok tê kuştin.
Ev zarok ne şervan in – ew dema ku di rêza xwarin û dermanan de ne têne kuştin an jî seqet dibin.”
Îsraîl: Êrişa 10’ê Tîrmehê xeletiyek teknîkî bû
Her wiha Îsraîl, di bersiva rexneyên navneteweyî yên li ser êrîşên dawî yên ku li Xezayê zarok kuştin de, îdia kir ku ew “li gorî qanûnê” hatine kirin.
Hêzên Parastina Îsraîlê (IDF) diyar kir ku êrîşa 10’ê Tîrmehê, ku herî kêm 10 zarokên ku li derveyî navenda bijîşkî ya Project Hope li Deyr el Belah a Xezayê li benda alîkariyê bûn kuştin, encama “xeletiyek teknîkî” bû.
Li gorî Hêzên Parastina Îsraîlê, hedefa êrîşê “terorîstek” girêdayî Cîhada Îslamî bû, lê cebilxane çend metre dûrî hedefê ket.
Li gorî agahiyan, bûyer hîn jî di bin lêpirsînê de ye.
Zêdebûna mirinan û krîza xwarinê li Xezayê
Zêdebûna hejmara mirina zarok, jin û sivîlan bi kêmbûna xwarinê li Xezayê re hevdem e.
Koordînatorê Alîkariya Mirovî ya Neteweyên Yekbûyî Tom Fletcher ji Konseya Ewlekariyê re got çavkaniyên xwarinê kêm dibin û sivîl dema ku li xwarinê digerin têne gulebarankirin.
Fletcher got:
“Sivîl di bin gefa mirin û birîndarbûnê de ne, bi zorê ji cih û warên xwe derdikevin û ji rûmeta xwe tên bêparkirin,”
Koordînatorê Alîkariya Mirovî bal kişand ser erkê Îsraîlê ku di bin Peymanên Cenevreyê de alîkariya xwarin û bijîşkî peyda bike.
Fletcher her wiha bang li Konseya Ewlekariyê kir ku bipirse ka gelo qaîdeyên mijûlbûnê yên Îsraîlê hemû tedbîrên ji bo pêşîgirtina li qurbaniyên sivîl vedihewîne.
